gham kahaan dekhne ki shai hai magar — Kamran Nafees

dil dhaDakne kaa sabab zindagi ho sakti hai
ye zaruri to nahin hai ki tiri yaad hi ho

kal dopahar ko saath rahaa thaa vo der tak
phir us ke baa'd shaam rahi shaam hi rahi

hamaare chaak-e-garebaan kaa taar thaa ye kabhi
ye jis pharere ko nikle hain aap lahraane

ek hi dar thaa gali mein vo bhi darvaaza huaa
jab se har aavaaz par be-kaar mein khulne lagaa

vo ik aavaaz thi manzil nahin thi
magar main us ki jaanib chal paDaa thaa

aa jaati hain kuchh khushiyaan andeshon mein
kuchh andeshe khushiyon mein aa jaate hain

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

ik raat us ke haath pe aansu giraa ke dekh
'mahmud' teraa chaand sitaara-shanaas hai

koi din aur gham-e-hijr mein shaadaan ho lein
abhi kuchh din mein samajh jaaeinge duniyaa kyaa hai