ye dard ki hai teri mohabbat ki amaanat — Kausar Niyazi

har marhala-e-gham mein mili is se tasalli
har moD pe ghabraa ke tiraa naam liyaa hai

bar-sar-e-aam iqraar agar naa-mumkin hai to yunhi sahi
kam-az-kam idraak to kar le gun be-shak mat maan mire

haal-e-dil us ko sunaa kar hai bahut khush 'kausar'
lekin ab soch zaraa kyaa tiri auqaat rahi

chand lamhon ke liye ek mulaaqaat rahi
phir na vo tu na vo main aur na vo raat rahi

apne vahshat-zada kamre ki ik almaari mein
teri tasvir aqidat se sajaa rakkhi hai

jazbaat mein aa kar marnaa to mushkil si koi mushkil hi nahin
ai jaan-e-jahaan ham tere liye jiinaa bhi gavaaraa karte hain

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ai gham-e-zindagi na ho naaraaz
mujh ko aadat hai muskuraane ki

nazar bachaa ke jo aansu kiye the main ne paak
khabar na thi yahi dhabbe baneinge daaman ke

ye zindagi hai apni kabhi khush kabhi udaas
is kashmakash se mujh ko khudaayaa rihaai de