main tamaashaa huun tamaashaai hain chaaron jaanib — KHalid Malik Sahil

chamak rahe the andhere mein soch ke jugnu
main apni yaad ke kheme mein so nahin paayaa

junun kaa koi fasaana to haath aane do
main ro paDungaa bahaana to haath aane do

ham log to akhlaaq bhi rakh aae hain 'saahil'
raddi ke isi Dher mein aadaab paDe the

khvaab dekhaa thaa mohabbat kaa mohabbat ki qasam
phir isi khvaab ki taabir mein masruf thaa main

bas ek khauf thaa zinda tiri judaai kaa
miraa vo aakhiri dushman bhi aaj maaraa gayaa

guzar rahi hai jo dil par vahi haqiqat hai
gham-e-jahaan kaa fasaana gham-e-hayaat se puchh

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa