'khaar' ulfat ki baat jaane do — Khar Dehlavi

chupke se sah rahaa huun sitam tere bevafaa
meri khataa to jab ho ki chuun kar rahaa huun main

chashm-e-giryaan ki aabyaari se
dil ke daaghon pe phir bahaar aai

mohabbat zulf kaa aaseb jaadu hai nigaahon kaa
mohabbat fitna-e-mahshar balaa-e-naa-gahaani hai

sach to ye hai ki duaa ne na davaa ne rakkhaa
ham ko zinda tire daaman ki havaa ne rakkhaa

main ne maanaa ki adu bhi tiraa shaidaai hai
farq hotaa hai fidaa hone mein mar jaane mein

uTThe na baiTh kar kabhi ku-e-habib se
us dar pe kyaa gae ki usi dar ke ho gae

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ik sadma-e-mohabbat ik sadma-e-judaai
ginti ke do hain lekin laakhon ki jaan par hain

pichhaa kisi tarah ye miraa chhoDtaa nahin
haathon se ishq ke koi jaave kahaan nikal

aatish-e-ishq vo jahannam hai
jis mein firdaus ke nazaare hain

mushkil-e-ishq mein laazim hai tahammul 'saaqib'
baat bigDi hui banti nahin ghabraane se