tumhaari bazm se tanhaa nahin uThaa 'khurshid' — Khursheed Rizvi

is e'tiraaf se ras ghul rahaa hai kaanon mein
vo e'tiraaf jo us ne abhi kiyaa bhi nahin

bas dariche se lage baiThe rahe ahl-e-safar
sabza jaltaa rahaa aur yaad-e-vatan aati rahi

maut ki ek alaamat hai agar dekhaa jaae
ruuh kaa chaar anaasir pe savaari karnaa

jo tamaam umr rahaa sabab ki talaash mein
vo tiri nigaah mein be-sabab nahin aa sakaa

ham teri tabiat ko 'khurshid' nahin samjhe
patthar nazar aataa thaa royaa to bahut royaa

jo shakhs na royaa thaa tapti hui raahon mein
divaar ke saae mein baiThaa to bahut royaa

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

koi sadi miri muntazir hai kisi sadi se guzar rahaa huun
main ek manzar mein ji uThungaa main ek manzar mein mar rahaa huun

us kaa chehraa udaas hai 'maajid'
aaine par nazar gai hogi