vahi akelaa hai anjuman mein — Lutf

tamaam umr miraa mujh se ikhtilaaf rahaa
gila na kar jo kabhi teraa ham-navaa na huaa

ab na vo zauq-e-vafaa hai na mizaaj-e-gham hai
hu-ba-hu garche koi teri misaal aayaa thaa

kis se ummid karein koi ilaaj-e-dil ki
chaaraagar bhi to bahut dard kaa maaraa niklaa

jaate jaate diyaa is tarah dilaasaa us ne
biich dariyaa mein koi jaise kinaara niklaa

main khud hi apne taaaqub mein phir rahaa huun abhi
uThaa ke tu meri raahon se raastaa le jaa

main dar-ba-dar huun abhi apni justuju mein bahut
main apne lahje ko andaaz de rahaa huun abhi

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ab main huun miri jaagti raatein hain khudaa hai
yaa TuTte patton ke bikharne ki sadaa hai

ham udaasi ke parastaar sahi
hanste chehron ko duaa dete hain

mere gham mujh se ye puchhaa karte hain
ghar mein pankhaa hai to rassi bhi hogi