kis se ummid karein koi ilaaj-e-dil ki — Lutf

tamaam umr miraa mujh se ikhtilaaf rahaa
gila na kar jo kabhi teraa ham-navaa na huaa

ab na vo zauq-e-vafaa hai na mizaaj-e-gham hai
hu-ba-hu garche koi teri misaal aayaa thaa

vahi akelaa hai anjuman mein
vahi hai tanhaa makaan mein bhi

jaate jaate diyaa is tarah dilaasaa us ne
biich dariyaa mein koi jaise kinaara niklaa

main khud hi apne taaaqub mein phir rahaa huun abhi
uThaa ke tu meri raahon se raastaa le jaa

main dar-ba-dar huun abhi apni justuju mein bahut
main apne lahje ko andaaz de rahaa huun abhi

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

har gham sahnaa aur khush rahnaa
mushkil hai aasaan nahin hai

in aansuon se bhalaa meraa kyaa bhalaa hogaa
vo mere baa'd jo royaa bhi yaad kar ke mujhe

khushi daaman-kashaan hai dil asir-e-gham hai barson se
hamaari zindagi kaa ek hi aalam hai barson se