vo nahin hai na sahi tark-e-tamannaa na karo — Mahmood Ayaz

tu ru-ba-ru ho to ai ru-e-yaar tujh se kahein
vo harf-e-gham ki harif-e-gham-e-zamaanaa hai

lafz o manzar mein maaani ko TaTolaa na karo
hosh vaale ho to har baat ko samjhaa na karo

chaand khaamosh jaa rahaa thaa kahin
ham ne bhi us se koi baat na ki

sham-e-shab-taab ek raat jali
jalne vaale tamaam umr jale

jiine vaalon se kaho koi tamannaa DhunDein
ham to aasuda-e-manzil hain hamaaraa kyaa hai

vo mire saath hai saae ki tarah
dil ki zid hai ki nazar bhi aae

roz zindaan ki divaar pe likhtaa hai koi
haae tanhaai salaasil se kahin bhaari hai

ajab mahfil hai sab ik dusre par hans rahe hain
ajab tanhaai hai khalvat ki khalvat ro rahi hai

mujhe dushman se apne ishq saa hai
main tanhaa aadmi ki dosti huun

raaz-e-sar-basta hai mahfil teri
jo samajh legaa vo tanhaa hogaa

haae vo baatein jo kah sakte nahin
aur tanhaai mein dohraate hain ham

baDh gai tujh se mil ke tanhaai
ruuh juyaa-e-ham-subu thi bahut