chaand khaamosh jaa rahaa thaa kahin — Mahmood Ayaz

tu ru-ba-ru ho to ai ru-e-yaar tujh se kahein
vo harf-e-gham ki harif-e-gham-e-zamaanaa hai

vo nahin hai na sahi tark-e-tamannaa na karo
dil akelaa hai ise aur akelaa na karo

lafz o manzar mein maaani ko TaTolaa na karo
hosh vaale ho to har baat ko samjhaa na karo

sham-e-shab-taab ek raat jali
jalne vaale tamaam umr jale

jiine vaalon se kaho koi tamannaa DhunDein
ham to aasuda-e-manzil hain hamaaraa kyaa hai

vo mire saath hai saae ki tarah
dil ki zid hai ki nazar bhi aae

vo chaand hai to aks bhi paani mein aaegaa
kirdaar khud ubhar ke kahaani mein aaegaa

muddaton baa'd kabhi ai nazar aane vaale
iid kaa chaand na dekhaa tiri surat dekhi

jalva-e-rukhsaar-e-saaqi saaghar-o-minaa mein hai
chaand uupar hai magar Duubaa huaa dariyaa mein hai

tumhaare husn ne har daanv mein use jiitaa
hazaar tarah se ghaT-baDh ke baazi haaraa chaand

vo chaand kah ke gayaa thaa ki aaj niklegaa
to intizaar mein baiThaa huaa huun shaam se main

duur jitnaa bhi chalaa jaae magar
chaand tujh saa to nahin ho saktaa