raaz-e-sar-basta hai mahfil teri — Baqi Siddiqui

is badalte hue zamaane mein
tere qisse bhi kuchh puraane lage

kuchh na paa kar bhi mutmain hain ham
ishq mein haath kyaa khazaane lage

yahi rasta hai ab yahi manzil
ab yahin dil kisi bahaane lage

rang-e-dil rang-e-nazar yaad aayaa
tere jalvon kaa asar yaad aayaa

ek hansti hui badli dekhi
ek jaltaa huaa ghar yaad aayaa

dosti khun-e-jigar chaahti hai
kaam mushkil hai to rasta dekho

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ishq mein dard se hai hurmat-e-dil
chashm ko aabru hai aansu se

hijr mein bhi ham udaas utne na the
mil ke bichhDe to hue jitne udaas

tujh se parda nahin mire gham kaa
tu miri zindagi kaa mahram hai