chale bhi aao mire jite-ji ab itnaa bhi — Mahshar Inayati

main divaana sahi lekin vo khush-qismat huun ai 'mahshar'
ki duniyaa ki zabaan par aa gayaa hai aaj naam apnaa

un kaa gham un kaa tasavvur un ki yaad
kaT rahi hai zindagi aaraam se

har ek baat zabaan se kahi nahin jaati
jo chupke baiThe hain kuchh un ki baat bhi samjho

kisi ki bazm ke haalaat ne samjhaa diyaa mujh ko
ki jab saaqi nahin apnaa to mai apni na jaam apnaa

baDi tavil hai 'mahshar' kisi ke hijr ki baat
koi ghazal hi sunaao ki niind aa jaae

qasam jab us ne khaai ham ne e'tibaar kar liyaa
zaraa si der zindagi ko khush-gavaar kar liyaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

main bahut jald lauT aaungaa
tum miraa intizaar mat karnaa

tamaam umr rahe meraa muntazir tu bhi
tamaam umr mire intizaar ko tarse

haan dil-e-be-taab chande intizaar
amn-o-raahat kaa Thikaana aur hai