kisi ki bazm ke haalaat ne samjhaa diyaa mujh ko — Mahshar Inayati

main divaana sahi lekin vo khush-qismat huun ai 'mahshar'
ki duniyaa ki zabaan par aa gayaa hai aaj naam apnaa

un kaa gham un kaa tasavvur un ki yaad
kaT rahi hai zindagi aaraam se

chale bhi aao mire jite-ji ab itnaa bhi
na intizaar baDhaao ki niind aa jaae

har ek baat zabaan se kahi nahin jaati
jo chupke baiThe hain kuchh un ki baat bhi samjho

baDi tavil hai 'mahshar' kisi ke hijr ki baat
koi ghazal hi sunaao ki niind aa jaae

qasam jab us ne khaai ham ne e'tibaar kar liyaa
zaraa si der zindagi ko khush-gavaar kar liyaa

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

pheinkiye kyuun mai-e-naaqis saaqi
shaikh-saahib ki ziyaafat hi sahi

mire haath suljhaa hi leinge kisi din
abhi zulf-e-hasti mein kham hai to kyaa gham

jaane kyaa barsaa thaa raat charaaghon se
bhor samay suraj bhi paani paani hai

tujh se dil mein jo gila thaa vo na laae lab par
phir se ham bhar gae zakhmon ko haraa kyaa karte