un kaa gham un kaa tasavvur un ki yaad — Mahshar Inayati

main divaana sahi lekin vo khush-qismat huun ai 'mahshar'
ki duniyaa ki zabaan par aa gayaa hai aaj naam apnaa

chale bhi aao mire jite-ji ab itnaa bhi
na intizaar baDhaao ki niind aa jaae

har ek baat zabaan se kahi nahin jaati
jo chupke baiThe hain kuchh un ki baat bhi samjho

kisi ki bazm ke haalaat ne samjhaa diyaa mujh ko
ki jab saaqi nahin apnaa to mai apni na jaam apnaa

baDi tavil hai 'mahshar' kisi ke hijr ki baat
koi ghazal hi sunaao ki niind aa jaae

qasam jab us ne khaai ham ne e'tibaar kar liyaa
zaraa si der zindagi ko khush-gavaar kar liyaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

sadiyon mein jaa ke bantaa hai aakhir mizaaj-e-dahr
'madni' koi taghayyur-e-aalam hai be-sabab

ik vaqt thaa ki dil ko sukun ki talaash thi
aur ab ye aarzu hai ki dard-e-nihaan rahe

khushi mahsus kartaa huun na gham mahsus kartaa huun
bahr-aalam tumhaaraa hi karam mahsus kartaa huun