meri aankhein kuchh soi si rahti hain — Majid Deobandi

jis ko chaahein be-izzat kar sakte hain
aap baDe hain aap ko ye aasaani hai

afsos jin ke dam se har ik su hain nafratein
ham ne taalluqaat unhin se baDhaa liye

yaad rakkho ik na ik din saanp baahar aaeinge
aastinon mein unhein kab tak chhupaayaa jaaegaa

in aansuon ki hifaazat bahut zaruri hai
andheri raat mein jugnu bhi kaam aate hain

phir tumhaare paanv chhune khud bulandi aaegi
sab dilon par raaj kar ke taaj-daari siikh lo

main jab bhi tajziya kartaa huun teraa ai duniyaa
is aaine mein tujhe bad-chalan si paataa huun

mere khvaabon ke jharokon ko sajaate rahiye
na sahi vasl magar yaad to aate rahiye

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

ik yaqin-parvar gumaan aur ik hayaat-aamez khvaab
jaise koi aaegaa aur uljhanein le jaaegaa

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne