phir tumhaare paanv chhune khud bulandi aaegi — Majid Deobandi

jis ko chaahein be-izzat kar sakte hain
aap baDe hain aap ko ye aasaani hai

afsos jin ke dam se har ik su hain nafratein
ham ne taalluqaat unhin se baDhaa liye

yaad rakkho ik na ik din saanp baahar aaeinge
aastinon mein unhein kab tak chhupaayaa jaaegaa

in aansuon ki hifaazat bahut zaruri hai
andheri raat mein jugnu bhi kaam aate hain

meri aankhein kuchh soi si rahti hain
shaayad in kaa khvaab-nagar se rishta hai

main jab bhi tajziya kartaa huun teraa ai duniyaa
is aaine mein tujhe bad-chalan si paataa huun

main baDaa ho gayaa huun magar bachpanaa
mere dil se kabhi bhi gayaa hi nahin

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

dil-e-haris hi apnaa na ho sakaa qaane
vagarna tere karam mein to kuchh kami na rahi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

main badalte hue haalaat mein Dhal jaataa huun
dekhne vaale adaakaar samajhte hain mujhe