har nayaa rasta nikaltaa hai jo manzil ke liye — Mohammad Yaqoob Aamir

na samjhe ashk-fishaani ko koi maayusi
hai dil mein aag agar aankh mein bhi paani hai

main aaj kal ke tasavvur se shaad-kaam to huun
ye aur baat ki do pal ki zindagaani hai

baad-e-nafrat phir mohabbat ko zabaan darkaar hai
phir aziz-e-jaan vahi urdu zabaan hone lagi

dhire dhire sar mein aa kar bhar gayaa barson kaa shor
rafta rafta aarzu-e-dil dhuaan hone lagi

mujhe bhi khud na thaa ehsaas apne hone kaa
tiri nigaah mein apnaa maqaam khone tak

sar ke niche iinT rakh kar umr bhar soyaa hai tu
aakhiri bistar bhi 'aamir' teraa farsh-e-khaak thaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein har qadam rah rah ke ye taklif hi dete
bahar-surat hamein in aablon ko phoD denaa thaa