din-daar log rab ko manaane mein mast hain — Nadim Nadeem

aah ko saaz banaate hain dukhon ki rut mein
dil-shikasta hain par aavaaz sanbhaale hue hain

kaise kaise log vujud ki zad mein aa kar mar gae
is dariyaa ki bheinT chaDhe kaise kaise tairaak

kyaa nayyaa aur kaisaa khevayyaa chaahne vaalo Duub maro
in aankhon ke dariyaaon mein aaj bhanvar bharpur paDe hain

vahshat nahin hai raqs-e-masarrat hai dasht mein
peDon ki shakl mein ye mire chaar-su ho tum

par kaTe panchhiyon se puchhte ho
tum mein uDne kaa hausla hai kyaa

badalte mausamon kaa haath thaame chalne vaalo
sukun pahunchaaegi tum ko shajar-kaari hamaari

khuub jaantaa hai ye ik faqir haathon mein
kab hai be-kasi rakhnaa kab hai mo'jiza rakhnaa

ham sufiyon kaa donon taraf se ziyaan huaa
irfaan-e-zaat bhi na huaa raat bhi gai

karim jo tujhe denaa hai be-talab de de
faqir huun pa nahin aadat-e-savaal mujhe

chhaaon detaa dhuup uThaataa raste mein
main ne dekhaa ek shajar darveshi mein

do-shaala shaal kashmiri amiron ko mubaarak ho
galim-e-kohna mein jaaDaa faqiron kaa basar hogaa

amir-zaadon se dilli ke mil na taa-maqdur
ki ham faqir hue hain inhin ki daulat se