ba-naam-e-amn-o-amaan kaun maaraa jaaegaa — Naseem Sahar

aavaazon ki bhiiD mein itne shor-sharaabe mein
apni bhi ik raae rakhnaa kitnaa mushkil hai

lafz bhi jis ahd mein kho baiThe apnaa e'tibaar
khaamushi ko is mein kitnaa mo'tabar main ne kiyaa

jo yaad-e-yaar se guft-o-shunid kar li hai
to goyaa phuul se khushbu kashid kar li hai

jo baat ki thi havaa mein bikharne vaali thi
jo khat likhaa thaa vo purzon mein baTne vaalaa thaa

diye ab shahr mein raushan nahin hain
havaa ki hukmaraani ho gai kyaa

kabhi to sard lagaa dopahar kaa suraj bhi
kabhi badan ke liye ik kiran ziyaada hui

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe