duur jitnaa bhi chalaa jaae magar — Nomaan Shauque

is baar intizaam to sardi kaa ho gayaa
kyaa haal peD kaTte hi basti kaa ho gayaa

vo saanp jis ne mujhe aaj tak Dasaa bhi nahin
tamaam zahr sukhan mein mire usi kaa hai

phir is mazaaq ko jamhuriyat kaa naam diyaa
hamein Daraane lage vo hamaari taaqat se

apni aahaT pe chaunktaa huun main
kis ki duniyaa mein aa gayaa huun main

vo tanz ko bhi husn-e-talab jaan khush hue
ulTaa paDhaa gayaa, miraa paighaam aur thaa

bas tire aane ki ik afvaah kaa aisaa asar
kaise kaise log the bimaar achchhe ho gae

vo chaand hai to aks bhi paani mein aaegaa
kirdaar khud ubhar ke kahaani mein aaegaa

charaag chaand shafaq shaam phuul jhiil sabaa
churaain sab ne hi kuchh kuchh shabaahatein teri

tu aae to mujh ko bhi
iid kaa chaand dikhaai de

aankhein maltaa rotaa chaand
dekho phir se niklaa chaand

chaand suraj ki tarah tum bhi ho qudrat kaa khel
jaise ho vaise raho bannaa bigaDnaa chhoDo

na chaand kaa na sitaaron na aaftaab kaa hai
savaal ab ke miri jaan tire javaab kaa hai