na chaand kaa na sitaaron na aaftaab kaa hai — Sarfaraz Khalid

kisi ne jaan hi luTaa di vafaaon ki khaatir
tum hi bataao ki qissa ye kis kitaab kaa hai

lambi hai bahut aaj ki shab jaagne vaalo
aur yaad mujhe koi kahaani bhi nahin hai

vo bhi na aayaa umr-e-guzishta ke misl hi
ham bhi khaDe rahe dar-o-divaar ki tarah

tiri duaaein bhi shaamil hain koshishon mein miri
musibaton kaa na Talnaa ajiib lagtaa hai

siyaah raat ke pahlu mein jism ke andar
kisi gunaah ki khvaahish ko paalte rahnaa

ham kisi aur vaqt ke hain asiir
subh ke shaam ke rahe hi nahin

vo chaand hai to aks bhi paani mein aaegaa
kirdaar khud ubhar ke kahaani mein aaegaa

bharpur nahin hain kisi chehre ke khad-o-khaal
dekhaa nahin vo chaand jo puuraa nazar aae

miraa ghar teri manzil gaah ho aise kahaan taalea
khudaa jaane kidhar kaa chaand aaj ai maah-ru niklaa

vahaan iid kyaa vahaan diid kyaa
jahaan chaand raat na aai ho

iid ke baa'd vo milne ke liye aae hain
iid kaa chaand nazar aane lagaa iid ke baad

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai