meri aankhon mein hain aansu tere daaman mein bahaar — Nushur Wahidi

duniyaa ki bahaaron se aankhein yuun pher liin jaane vaalon ne
jaise koi lambe qisse ko paDhte paDhte uktaa jaae

hazaar shama farozaan ho raushni ke liye
nazar nahin to andheraa hai aadmi ke liye

khaak aur khuun se ik shama jalaai hai 'nushur'
maut se ham ne bhi sikhi hai hayaat-aaraai

diyaa khaamosh hai lekin kisi kaa dil to jaltaa hai
chale aao jahaan tak raushni maalum hoti hai

sarak kar aa gaiin zulfein jo in makhmur aankhon tak
main ye samjhaa ki mai-khaane pe badli chhaai jaati hai

aghyaar ko gul-pairahani ham ne ataa ki
apne liye phulon kaa kafan ham ne banaayaa

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

udaas khushk labon par laraz rahaa hogaa
vo ek bosa jo ab tak miri jabin pe nahin

saaf qulqul se sadaa aati hai aamin aamin
apne saaqi ko jo ham rind duaa dete hain