ye aankhein ye dimaagh ye zakhmon kaa ghar badan — Obaidullah Siddiqui

isi falak se utartaa hai ye andheraa bhi
ye raushni bhi isi aasmaan se aati hai

ye kis kaa chehra damaktaa hai meri aankhon mein
ye kis ki yaad mujhe kahkashaan se aati hai

pahle chingaari se ik shola banaataa hai mujhe
phir vahi tez havaaon se Daraataa hai mujhe

shaam hoti hai to meraa hi fasaana aksar
vo jo TuuTaa huaa taaraa hai sunaataa hai mujhe

zindagi ik khvaab hai ye khvaab ki taabir hai
halqa-e-gesu-e-duniyaa paanv ki zanjir hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

sajda-e-ishq pe tanqid na kar ai vaaiz
dekh maathe pe abhi chaand numaayaan hogaa

tiri abru hai mehraab-e-mohabbat
namaaz-e-ishq mere par hui farz