ajiib shai hai tasavvur ki kaar-farmaai — Payam Fatehpuri

sukun de na sakin raahatein zamaane ki
jo niind aai tire gham ki chhaanv mein aai

nafas nafas pe yahaan rahmaton ki baarish hai
hai bad-nasib jise zindagi na raas aai

malaamaton se junun mein na kuchh kami aai
jaraahaton se baDhi zakhm-e-dil ki raanaai

khushi visaal ki ab hai na ranj-e-tanhaai
ye kis maqaam pe mujh ko hayaat le aai

phailaa fazaa mein naghma-e-zanjir-e-marhabaa
zindaan mein ghuT ke rah na saki zindagi ki baat

taarikh-e-kaaenaat-e-ibaadat junun se hai
unvaan-e-aql-o-hosh hai divaangi ki baat

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

udaas aankhon se aansu nahin nikalte hain
ye motiyon ki tarah sipiyon mein palte hain

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

dasht ki naa-tamaam raahon par
koi saathi hai to shajar tanhaa