sukun de na sakin raahatein zamaane ki — Payam Fatehpuri

ajiib shai hai tasavvur ki kaar-farmaai
hazaar mahfil-e-rangin sharik-e-tanhaai

nafas nafas pe yahaan rahmaton ki baarish hai
hai bad-nasib jise zindagi na raas aai

malaamaton se junun mein na kuchh kami aai
jaraahaton se baDhi zakhm-e-dil ki raanaai

khushi visaal ki ab hai na ranj-e-tanhaai
ye kis maqaam pe mujh ko hayaat le aai

phailaa fazaa mein naghma-e-zanjir-e-marhabaa
zindaan mein ghuT ke rah na saki zindagi ki baat

taarikh-e-kaaenaat-e-ibaadat junun se hai
unvaan-e-aql-o-hosh hai divaangi ki baat

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ye aansu ponchh lijiye aur muskuraaiye
chaara nahin hai koi bhi rukhsat kiye baghair

husn jalva dikhaa gayaa apnaa
ishq baiThaa rahaa udaas kahin

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

raaz-e-gham-e-ulfat ko ye duniyaa na samajh le
aansu mire daaman mein tumhaare bhi mile hain