log karte hain khvaab ki baatein — Sabir Dutt

ye kaisi siyaasat hai mire mulk pe haavi
insaan ko insaan se judaa dekh rahaa huun

phir laai hai barsaat tiri yaad kaa mausam
gulshan mein nayaa phuul khilaa dekh rahaa huun

ji bhar ke tumhein dekh luun taskin ho kuchh to
mat shama bujhaao ki abhi raat bahut hai

zulf ki shaam subh chehre ki
yahi mausam janaab de diije

rukh un kaa kahin aur nazar aur taraf hai
kis samt se aati hai qazaa dekh rahaa huun

muddaton baad uThaae the puraane kaaghaz
saath tere miri tasvir nikal aai hai

mere khvaabon ke jharokon ko sajaate rahiye
na sahi vasl magar yaad to aate rahiye

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

phir nai hijrat koi darpesh hai
khvaab mein ghar dekhnaa achchhaa nahin

zindagi azmat-e-haazir ke baghair
ik tasalsul hai magar khvaabon kaa