khvaab tumhaare aate hain — Sabir Waseem

jaane kis ki aas lagi hai jaane kis ko aanaa hai
koi rail ki siiTi sun kar sote se uTh jaataa hai

pahlaa patthar yaad hamesha rahtaa hai
dukh se dil aabaad hamesha rahtaa hai

ye umr bhar kaa safar hai isi sahaare par
ki vo khaDaa hai abhi dusre kinaare par

kaisaa jhuTaa sahaaraa hai ye dukh se aankh churaane kaa
koi kisi kaa haal sunaa kar apnaa-aap chhupaataa hai

dekho aisaa ajab musaafir phir kab lauT ke aataa hai
dariyaa us ko rasta de kar aaj talak pachhtaataa hai

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

vo ek khvaab jo phir lauT kar nahin aayaa
vo ik khayaal jise main bhulaa nahin saktaa

tiraa aanaa mire ghar ho gayaa ghar ghair ke jaanaa
mujhe maalum thi is khvaab ki taabir pahle se