tang aate bhi nahin kashmakash-e-dahr se log — Sahar Ansari

ajiib hote hain aadaab-e-rukhsat-e-mahfil
ki vo bhi uTh ke gayaa jis kaa ghar na thaa koi

mahfil-aaraai hamaari nahin ifraat kaa naam
koi ho yaa ki na ho aap to aae hue hain

ham ko jannat ki fazaa se bhi ziyaada hai aziiz
yahi be-rang si duniyaa yahi be-mehr se log

jise guzaar gae ham baDe hunar ke saath
vo zindagi thi hamaari hunar na thaa koi

shikva-e-talkhi-e-haalaat bajaa hai lekin
is pe rotaa huun ki main ne bhi rulaayaa hai tujhe

ye marnaa jiinaa bhi shaayad majburi ki do lahrein hain
kuchh soch ke marnaa chaahaa thaa kuchh soch ke jiinaa chaahaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ret par ik nishaan hai shaayad
ye hamaaraa makaan hai shaayad