main ghaTtaa jaa rahaa huun apne andar — Salim Saleem

is dil mein chubhaa rahtaa thaa kaanTe ki tarah vo
ik roz use main ne mohabbat se nikaalaa

kitne bekaar khudaaon ki ibaadat ki hai
aakhiri baar kisi but se shikaayat ki hai

aa rahaa hogaa vo daaman se havaa baandhe hue
aaj khushbu ko pareshaan kiyaa jaaegaa

charaagh-e-ishq badan se lagaa thaa kuchh aisaa
main bujh ke rah gayaa us ko havaa banaane mein

juz hamaare kaun aakhir dekhtaa is kaam ko
ruuh ke andar koi kaar-e-badan hotaa huaa

sunaa hai chaand ko uljhaa liyaa hai shaakhon ne
so ab charaagh darichon pe rakh diye jaaein

mere khvaabon ke jharokon ko sajaate rahiye
na sahi vasl magar yaad to aate rahiye

jab jaam diyaa thaa saaqi ne jab daur chalaa thaa mahfil mein
ik hosh ki saaat kyaa kahiye kuchh yaad rahi kuchh bhuul gae

ham ko jannat ki fazaa se bhi ziyaada hai aziiz
yahi be-rang si duniyaa yahi be-mehr se log

DhunDhne ko tujhe o mere na milne vaale
vo chalaa hai jise apnaa bhi pataa yaad nahin

lambi hai bahut aaj ki shab jaagne vaalo
aur yaad mujhe koi kahaani bhi nahin hai

kabhi kabhi tu mujhe yaad kar to leti hai
sukun itnaa saa kaafi hai zindagi ke liye