shaakh-e-mizhgaan pe mahakne lage zakhmon ke gulaab — Shahid Kamal

haan vaz-e-ehtiyaat kaa qaail nahin huun mein
jo zakhm hai jigar mein chhupaane se main rahaa

jab Duub ke marnaa hai to kyaa soch rahe ho
in jhiil si aankhon mein utar kyuun nahin jaate

jang kaa shor bhi kuchh der to tham saktaa hai
phir se ik amn ki afvaah uDaa di jaae

tu mere saath nahin hai to sochtaa huun main
ki ab to tujh se bichhaDne kaa koi Dar bhi nahin

in dinon apni bhi vahshat kaa ajab aalam hai
ghar mein ham dasht-o-bayaabaan uThaa laae hain

burida-sar ko sajaa de fasil-e-neza par
darida jism ko phir arsa-e-qitaal mein rakh

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gul kiyaa jis ne vo thaa aur magar
shama ne shikva havaaon se kiyaa

abhi baaqi hain patton par jale tinkon ki tahrirein
ye vo taarikh hai bijli giri thi jab gulistaan par

naqsh-e-kaf-e-paa ne gul khilaae
viraan kahaan ab ye raasta hai