paarsaa ban ke su-e-mai-khaana — Sharaf Mujaddidi

is parde mein ye husn kaa aalam hai ilaahi
be-parda vo ho jaaein to kyaa jaaniye kyaa ho

teri aankhein jise chaahein use apnaa kar lein
kaash aisaa hi sikhaa dein koi afsun mujh ko

dil mein mire jigar mein mire aankh mein miri
har jaa hai dost aur nahin milti hai jaa-e-dost

allaah allaah khususiyyat-e-zaat-e-hasnain
saari ummat ke hain poton se navaase baDh kar

tamaam chaaragaron se to mil chukaa hai javaab
tumhein bhi dard-e-mohabbat sunaae dete hain

ushshaaq ke aage na laDaa ghairon se aankhein
Dar hai ki na ho jaae laDaai tire dar par

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

nizaam-e-mai-kada saaqi badalne ki zarurat hai
hazaaron hain safein jin mein na mai aai na jaam aayaa

vo qulqul-e-minaa mein charche miri tauba ke
aur shisha-o-saaghar ki mai-khaane mein sargoshi

tum to ai khushbu havaao us se mil kar aa gaiin
ek ham the zakhm-e-tanhaai haraa karte rahe

zamin ke zakhm samundar to bhar na paaegaa
ye kaam dida-e-tar tujh ko saunpnaa hogaa