ik samt ghar ke log hain ik samt 'ishq hai — Sultan Shaafi

zindagi ek film hai meri
jis mein hansne kaa scene hai hi nahin

vahshat ne mujh hasin ko behaal kar diyaa
kamzor dil ke log na dekhein miri taraf

puchh mujh se ki kis tarah main ne
teri tasvir pe guzaaraa kiyaa

haalaanki ek shakhs tumhaari jagah pe hai
lekin tumhaaraa is se khalaa bhar nahin rahaa

hamaari aankh ke aansu sameTo
tumhaaraa is se kharcha chal rahaa hai

dekh aansu na qaid ho jaae
meri tasvir khinchne vaale

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

isi liye hamein ehsaas-e-jurm hai shaayad
abhi hamaari mohabbat nai nai hai naa

itnaa bhi naa-umid dil-e-kam-nazar na ho
mumkin nahin ki shaam-e-alam ki sahar na ho

ishq ki azmatein bajaa lekin
ishq hi maqsad-e-hayaat nahin

apne khuun kaa un pe kyuun daavaa kiyaa
ai dil-e-naadaan ye tu ne kyaa kiyaa