safar mein hoti hai pahchaan kaun kaisaa hai — Taimur Hasan

phir jo karne lagaa hai tu vaada
kyaa mukarne kaa phir iraada hai

miri tavajjoh faqat mire kaam par rahegi
main khud ko saabit karungaa daavaa nahin karungaa

ham duniyaa se jab tang aayaa karte hain
apne saath ik shaam manaayaa karte hain

zindagi jang hai aasaab ki aur ye bhi suno
ishq aasaab ko mazbut banaa detaa hai

main ne bakhsh di tiri kyuun khataa tujhe ilm hai
tujhe di hai kitni kaDi sazaa tujhe ilm hai

zindagi bhar ki riyaazat miri be-kaar gai
ik khayaal aayaa thaa badle mein vo kyaa detaa hai

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

apne ajdaad ki dastaar ko dekhaa aur phir
kar liyaa dil ki tamanna se kinaara main ne

tiri aarzu se bhi kyuun nahin gham-e-zindagi mein koi kami
ye savaal vo hai ki jis kaa ab koi ik javaab nahin rahaa

mere sukhan ki daad bhi us ko hi dijiye
vo jis ki aarzu mujhe shaaer banaa gai

ab to ehsaas-e-tamannaa bhi nahin
qaafila dil kaa luTaa ho jaise