mere sukhan ki daad bhi us ko hi dijiye — Sahba Akhtar

shaayad vo sang-dil ho kabhi maail-e-karam
surat na de yaqin ki is ehtimaal ko

'sahbaa' saahab dariyaa ho to dariyaa jaisi baat karo
tez havaa se lahar to ik jauhaD mein bhi aa jaati hai

main use samjhun na samjhun dil ko hotaa hai zarur
laala o gul par gumaan ik ajnabi tahrir kaa

tum ne kahaa thaa chup rahnaa so chup ne bhi kyaa kaam kiyaa
chup rahne ki aadat ne kuchh aur hamein badnaam kiyaa

agar shuur na ho to bahisht hai duniyaa
baDe azaab mein guzri hai aagahi ke saath

miri tanhaaiyon ko kaun samjhe
main saaya huun magar khud se judaa huun

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

fareb-e-qurb-e-yaar ho ki hasrat-e-supurdagi
kisi sabab se dil mujhe ye be-qaraar chaahiye

apne kaandhe pe liye phirti hai ehsaas kaa bojh
zindagi kyaa kisi maqtal ki tamannaai hai

shikast-e-‘ahd-e-tamanna ki kyaa shikaayat ho
hamaare khvaab hi ham se gurez-paa nikle

gale se lag zabaan ko chhu koi khvaahish bhi puuri kar
dilaason se kahaan gham ki fazaa tabdil hoti hai