meri aankhon mein aa ke raakh huaa — Tauqeer Abbas

bahaar dard bharaa iqtibaas chhoD gai
har ik shajar kaa badan be-libaas chhoD gai

phir yahi baat na main bhuul sakaa
main use bhuul gayaa thaa ik din

chhoD aayaa thaa mez par chaae
ye judaai kaa istiaaraa thaa

vaqt kar degaa faisla is kaa
kaun sachchaa hai kaun jhuTaa hai

lahu meri nason mein bhi kabhi kaa jam chukaa thaa
badan par barf ko oDhe nadi bhi so rahi thi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

jism-e-aazaadi mein phunki tu ne majburi ki ruuh
khair jo chaahaa kiyaa ab ye bataa ham kyaa karein

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa