jaante hain ham mohabbat-aazmaai ho chuki — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

laDne ke liye hai na nasihat ke liye hai
jis 'umr mein tum ho vo mohabbat ke liye hai

tum ko hazaar sharm sahi mujh ko laakh zabt
ulfat vo raaz hai ki chhupaayaa na jaaegaa

karun qat-e-ulfat buton se va-lekin
ye kaafir miraa dil nahin maantaa hai