ham du'aa ko haath uThaae giDgiDaate rah gae — Waseem Haidar

qaid kartaa huun hasratein dil mein
phir inhein khud-kushi sikhaataa huun

tujh ko ho mere lams ki khvaahish shadid-tar
tujh se tamaam 'umr miraa saamnaa na ho

suntaa rahtaa huun to vo kuchh bhi kahe jaataa hai
us ko lagtaa hai ki me'yaar yahi hai apnaa

havas na puuri hui jab kahin to 'ilm huaa
tire badan kaa rahaa mujh ko aasraa baDi der

ab vo achchhaa mujhe pasand nahin
jo buraa bhi qubul hotaa thaa

mire khamir pe saari hi sarf ho gai thi
phir us ke baa'd udaasi nai banaai gai

ye imtiyaaz zaruri hai ab ibaadat mein
vahi duaa jo nazar kar rahi hai lab bhi karein

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

takmil-e-aarzu se bhi hotaa hai gham kabhi
aisi duaa na maang jise bad-duaa kahein

abhi dilon ki tanaabon mein sakhtiyaan hain bahut
abhi hamaari duaa mein asar nahin aayaa

ye kaisi bad-duaa di hai kisi ne
samundar huun magar khaaraa huaa huun

bosa bhi mujhe denaa honTon mein bhi kuchh kahnaa
jiine ki davaa denaa marne ki duaa karnaa