halki si khalish dil mein nigaahon mein udaasi — Wasif Dehlvi

bujhte hue charaagh farozaan kareinge ham
tum aaoge to jashn-e-charaaghaan kareinge ham

didaar se pahle hi kyaa haal huaa dil kaa
kyaa hogaa jo ulTeinge vo rukh se naqaab aakhir

kitni ghaTaaein aaiin baras kar guzar gaiin
shola hamaare dil kaa bujhaayaa na jaa sakaa

daaman ke daagh ashk-e-nadaamat ne dho diye
lekin ye dil kaa daagh miTaayaa na jaa sakaa

aaj rukhsat ho gayaa duniyaa se ik bimaar-e-gham
dard aisaa dil mein uTThaa jaan le kar hi gayaa

qismat ki tirgi ki kahaani na puchhiye
subh-e-vatan bhi shaam-e-gharibaan hai aaj kal

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

tiraa mariz huun main doctor kaa ghar na bataa
ye dard-e-ishq hai zaalim koi bukhaar nahin

dard ho dukh ho to davaa kiije
phaT paDe aasmaan to kyaa kiije

chhoD kar baar-e-sadaa vo be-sadaa ho jaaegaa
vahm thaa meraa ki patthar aaina ho jaaegaa