dard ho dukh ho to davaa kiije — Jigar Barelvi

tasalli aap ne di farq hai haan dil ki haalat mein
jo tham tham kar khalish hoti thi paiham hoti jaati hai

ye sher mere use sunaa do
puchhe jo koi 'jigar' main kyaa huun

ishq mein qadr-e-khastagi ki ummid
ai 'jigar' hosh ki davaa kijiye

aaj kyaa jaane kyaa hai hone ko
ji bahut chaahtaa hai rone ko

ham aur uThaaeinge ehsaan jaan-navaazi ke
hamein to saans bhi lenaa giraan guzartaa hai

maraz-e-ishq ko shifaa samjhe
dard ko dard ki davaa samjhe

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

gham-e-dauraan mein kahaan baat gham-e-jaanaan ki
nazm hai apni jagah khuub magar haae ghazal

aaThon pahr lahu mein nahaayaa kare koi
yuun bhi na apne dard ko dariyaa kare koi

ye kis maqaam pe laai hai zindagi ham ko
hansi labon pe hai siine mein gham kaa daftar hai