dard-e-dil zindagi ki khushi pi gayaa — Yasir Tahsin

haae vo shokh sandali qaamat
jis ne mujh be-niyaaz ko maaraa

chal diye hain bol kar vaapas na lauTeinge kabhi
chal diye hain ik daf'a phir lauT aane ke liye

tum jo kahte ho chuum loge hamein
karne vaale kahaa nahin karte

us ne din jaldi Dhalne ki khvaahish ki
dharti ne raftaar baDhaa di gardish ki

pahle tu ik jhuTe gham mein miT jaane kaa naaTak rach
phir duniyaa ko jaa jaa kar batlaa tu kitne dukh mein hai

aisi tanhaa raaton mein hi aati hai
ek ghazal jo shaa'ir ko khaa jaati hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

bahut se gham to diye 'zabt' aise logon ne
ki jin se koi tavaqqo na thi vafaa ke sivaa

raah takte jism ki majlis mein sadiyaan ho gaiin
jhaank kar andhe kunein mein ab to koi bol de

tere jaane se zyaada hain na kam pahle the
ham ko laahaq hain vahi ab bhi jo gham pahle the