jis ki kuchh taabir na ho — Zaheer Rahmati

khushi se apnaa ghar aabaad kar ke
bahut roeinge tum ko yaad kar ke

kisi din uqda-e-mushkil bhi khultaa
kabhi ham par bhi tum aasaan hote

sadiyon mein koi ek mohabbat hoti hai
baaqi to sab khel tamaashaa hotaa hai

aur ehsaas-e-jihaalat baDh gayaa
kis qadar paDh likh ke jaahil ho gae

zamaane bhar ko hai ummid usi se
vo naa-ummid aisaa kar rahaa hai

yuun hi ham dard apnaa kho rahe hain
yahi ronaa hai ham kyuun ro rahe hain

mere khvaabon ke jharokon ko sajaate rahiye
na sahi vasl magar yaad to aate rahiye

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

khvaab ke jaisaa na paayaa khvaab ki taa'bir se
dard vahshat hijr sahraa hi milaa taqdir se

niind aati hai magar jaag rahaa huun sar-e-khvaab
aankh lagti hai to ye umr guzar jaani hai