hamein us se judaa honaa paDaa thaa — Zoya Shaikh

khaamushi kaa sabab nahin kuchh bhi
mujh ko bas guftugu se nafrat hai

vo miri saadgi pe martaa hai
mujh ko gahnon ki kyaa zarurat hai

khuddaar khud-parast hain ziddi balaa ke hain
ham jo gae to lauT ke vaapas na aaeinge

phir yuun huaa ki zindagi ik bojh ban gai
ik shakhs mere haath se yak-lakht kho gayaa

suno aao nayaa ik zakhm bakhsho
tumhaaraa hijr buDhaa ho gayaa hai

ishq hai mujh se use yaa ki faqat hamdardi
jab bhi vo chhoD ke jaataa hai palaT aataa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa