Ghazal

"yaad aa gayaa vo shakhs to yaad aae jaaegaa rulvaae jaaegaa hamein taDpaae jaaegaa taa'bir se kabhi to navaazegaa aasmaan kab tak hamaare khvaab-mahal Dhaae jaaegaa sar 'ishq ki muhim nahin hoti dimaagh se jo sochtaa rahegaa vo ghabraae jaaegaa itnaa bhi sabr-o-shukr kaa qaail nahin ki dil har kaifiyat mein aap ke gun gaae jaaegaa aataa hai rahm naaseh-e-mushfiq ke haal par be-chaara 'umr-bhar hamein samjhaae jaaegaa nazrein haTaa haTaa ke na kyon guftugu karein ham dekhe jaaeinge to vo sharmaae jaaegaa thoDi 'sha'ur' aur chaDhaa le to har taraf saaghar nachaae jaaegaa chhalkaae jaaegaa"

"rahi raat un se mulaaqaat kam mudaaraat khaasi hui baat kam tiri yaad itnaa baDaa kaam hai ki maalum hote hain din raat kam kahin dil bahaltaa nahin shahr mein na baazaar kam hain na baaghaat kam mohabbat mein hoti hain insaan ko shikastein ziyaada futuhaat kam sambhaale hue hai ye shoba bhi dil ab aankhon se hoti hai barsaat kam dimaaghon ki parvaaz maalum hai savaalaat vaafir javaabaat kam bahut son se achchhaa huun phir bhi 'shuur' digar-gun nahin mere haalaat kam"

"mere siine mein kuchh zer-o-zabar hai chaman mein ghaaliban vaqt-e-sahar hai chalaa jaataa huun aksar shahr vaalo bayaabaan mein bhi meraa ek ghar hai jo chehre par nazar aati hai mere meri rangat nahin gard-e-safar hai koi Tiktaa nahin dil mein ziyaada ye goyaa ghar nahin hai rahguzar hai nazar aate hain bas aamaal sab ko mere ahvaal par kis ki nazar hai agar 'anvar-shu'ur' aisaa kare to nazar-andaaz kar denaa bashar hai"

"aise dekhaa hai ki dekhaa hi na ho jaise mujh ko tiri parvaa hi na ho baaz ghar shahr mein aise dekhe jaise un mein koi rahtaa hi na ho mujh se katraa ke bhalaa kyuun jaataa shaayad us ne mujhe dekhaa hi na ho ye samajhtaa hai har aane vaalaa main na aauun to tamaashaa hi na ho yuun bhaTakne pe huun qaane jaise raaston mein koi dariyaa hi na ho raat har chaap pe aataa thaa khayaal uTh ke dekhun koi aayaa hi na ho kaise chhoDun dar-o-divaar apne kyaa khabar lauT ke aanaa hi na ho hain sabhi ghair to apnaa maskan shahr kyuun ho koi sahraa hi na ho yuun to kahne ko bahut kuchh hai 'shuur' kyaa kahun jab koi suntaa hi na ho"

"ittifaaq apni jagah khush-qismati apni jagah khud banaataa hai jahaan mein aadmi apni jagah kah to saktaa huun magar majbur kar saktaa nahin ikhtiyaar apni jagah hai bebasi apni jagah kuchh na kuchh sachchaai hoti hai nihaan har baat mein kahne vaale Thiik kahte hain sabhi apni jagah sirf us ke honT kaaghaz par banaa detaa huun main khud banaa leti hai honTon par hansi apni jagah dost kahtaa huun tumhein shaaer nahin kahtaa 'shuur' dosti apni jagah hai shaaeri apni jagah"

"vo bhi kyaa daur zindagi kaa thaa koi meraa thaa main kisi kaa thaa aankh kyaa aaftaab par jamti masala tez raushni kaa thaa un ke aane pe aa gae aansu go ye mauqa' bahut khushi kaa thaa dost milte the sirf matlab se naam badnaam dosti kaa thaa apnaa dukhDaa kise sunaate ham yahi 'aalam har aadmi kaa thaa chaahe jaanaa ho chaahe aanaa ho raasta ek us gali kaa thaa thaa 'sha'ur' inkisaar kaa paikar ye natija khud-aagahi kaa thaa"

"divaar jaane dijiye dar jaane dijiye dasht-o-daman basaaiye ghar jaane dijiye har phuul dekhne ke liye hai bahaar kaa jis jis pe jaa rahi hai nazar jaane dijiye taufiq jis 'amal ki nahin paarsaaon ko vo is gunaahgaar ko kar jaane dijiye hogaa ye raah-e-sidq-o-safaa mein baDaa qadam sar jaa rahaa hai aaj to sar jaane dijiye bohtaat khair ki bhi buri shar ki bhi buri is baat mein hai khair ki shar jaane dijiye phir munh hatheliyon mein chhupaa lijiyegaa aap aankhon mein aur dil mein utar jaane dijiye fursat qalil aur kahaani tavil hai baatein to hain hazaar magar jaane dijiye mat rokiye jihaad se 'anvar-sha'ur' ko marnaa hi chaahtaa hai to mar jaane dijiye"

"ham us ke sahi vo hamaaraa nahin mohabbat pe koi ijaara nahin main fitrat ki ik khaam tasvir huun kisi ne banaayaa sanvaaraa nahin nikammaa nahin huun nihatthaa huun main madad chaahtaa huun sahaaraa nahin hamesha zamaane se sach bolnaa use jhuuT bilkul gavaara nahin mujhe chain se niind aa jaaegi bas ik baar mil lo dobaara nahin use jo pari-zaad kahtaa huun main haqiqat hai ye isti'aara nahin kisi aur se lau lagaao 'sha'ur' ab is ke sivaa koi chaara nahin"

"un ki surat hamein aai thi pasand aankhon se aur phir ho gai baalaa-o-buland aankhon se koi zanjir nahin taar-e-nazar se mazbut ham ne is chaand pe Daali hai kamand aankhon se Thahr sakti hai kahaan us rukh-e-taabaan pe nazar dekh saktaa hai use aadmi band aankhon se ham uThaate hain maza talkhi o shirini kaa mai piyaale se pilaataa hai vo qand aankhon se baat karte ho to hotaa hai zabaan se sadma dekhte ho to pahunchtaa hai gazand aankhon se har mulaaqaat mein hoti hain hamaare maabain chand baatein lab-e-guftaar se chand aankhon se ishq mein hausla-mandi bhi zaruri hai 'shuur' dekhiye us ki taraf hausla-mand aankhon se"

"kuchh dinon apne ghar rahaa huun main aur phir dar-ba-dar rahaa huun main dusron ki khabar to kyaa letaa khud se bhi be-khabar rahaa huun main vaqt go ham-safar na thaa meraa vaqt kaa ham-safar rahaa huun main zina-e-zaat kaa safar aur raat dhire dhire utar rahaa huun main yak-ba-yak kis tarah badal jaaun rafta rafta sudhar rahaa huun main tu bhi dekhe to ajnabi jaane ab ke vo svaang bhar rahaa huun main be-haqiqat hai shor-e-shahr ki ab gungunaataa guzar rahaa huun main aag hai aur sulag rahi hai hayaat raakh huun aur bikhar rahaa huun main"

"dhoka karein fareb karein yaa daghaa karein ham kaash dusron pe na tohmat dharaa karein rakkhaa karein har ek khataa apne dosh par har jurm apni fard-e-‘amal mein likhaa karein ahbaab agar tamaam nahin laaiq-e-vafaa ek aadh baa-vafaa se to vaa'da vafaa karein ruThaa karein zarur magar is tarah nahin apni kahaa karein na kisi ki sunaa karein chhapvaa diyaa karein kisi akhbaar mein kalaam lekin mushaa'iron mein na shirkat kiyaa karein e'laan-e-tark-e-baada-gusaari ke baavajud piinaa hi laazmi ho to chhup kar piyaa karein ghar mein hazaar adaaein dikhaayaa karein 'shu'ur' duniyaa ke saamne na tamaasha banaa karein"

"mujhe ye justuju kyuun ho ki kyaa huun aur kiyaa thaa main koi apne sivaa huun main koi apne sivaa thaa main na jaane kaun saa aatish-fishaan thaa mere siine mein ki khaali thaa bahut phir bhi dhamak kar phaT paDaa thaa main to kyaa main ne nashe mein vaaqai ye guftugu ki thi mujhe khud bhi nahin maalum thaa jo sochtaa thaa main khud apne khol mein ghuT kar na rah jaataa to kyaa kartaa yahaan ik bhiiD thi jis bhiiD mein gum ho gayaa thaa main na luTnaa meri qismat hi mein thaa likkhaa huaa varna andheri raat thi aur biich raste mein khaDaa thaa main guzarne ko to mujh par bhi ajab ik haadisa guzraa magar us vaqt jab sadmon kaa aadi ho chukaa thaa main main kahtaa thaa suno sachchaai to khud hai sila apnaa ye nukta iktisaabi thaa magar sach boltaa thaa main tujhe to dusron se bhi ulajhne mein takalluf thaa mujhe to dekh apne-aap se uljhaa huaa thaa main khulus o iltifaat o mehr jo hai ab usi se hai jise pahle na jaane kis nazar se dekhtaa thaa main jo ab yuun mere girdaa-gird hain kuchh roz pahle tak unhi logon ke haq mein kis qadar sabr-aazmaa thaa main bahut khush-khulq thaa main bhi magar ye baat jab ki hai na auron hi se vaaqif thaa na khud ko jaantaa thaa main"

"ham use kaash ru-baru karte aur aankhon se guftugu karte dosto mere saath ye neki tum na karte to kyaa 'adu karte ham se puchhe koi pata us kaa 'umr guzri hai justuju karte ai shu'ur aasmaan hil jaataa ham jo baa-ikhtiyaar hu karte"

"bayaabaan huun yaa samundar huun main vahi saamne huun jo andar huun main khudaaraa na khulvaao meri zabaan shikaayaat kaa ek daftar huun main mayassar hai kaunain saa ghar mujhe magar tum nahin ho to be-ghar huun main khuli hai miri aankh jis roz se kisi justuju mein baraabar huun main na jaane vo rangat hai yaa raushni use jab se dekhaa hai shashdar huun main kahaan sahl us tak pahunchnaa 'sha'ur' havaa mein nahin huun zamin par huun main"

"saamne aa kar vo kyaa rahne lagaa ghar kaa darvaaza khulaa rahne lagaa paas rahne se to apne darmiyaan jaise koi faasla rahne lagaa duur ki daulat mili to raat din ek dhaDkaa saa lagaa rahne lagaa gaahe gaahe koi aataa thaa yahaan phir baraabar jamghaTaa rahne lagaa dil mein thaa hi kyaa magar dil ke baghair aur siine mein khalaa rahne lagaa ittifaaqi shauq thaa pahle 'sha'ur' phir musalsal rat-jagaa rahne lagaa"

"puuri sazaa-e-zindagi karne ke baa'd hi ab ham rihaai paaeinge marne ke baa'd hi aaraam se raho ki taDapte raho miyaan aati hai subh raat guzarne ke baa'd hi miTTi mein hasraton ki laDi mil gai magar kuchh daane chun liye the bikharne ke baa'd hi dozakh kaa zikr maulvi saahab kaa farz hai aate hain log raah pe Darne ke baa'd hi maanaa ki sair ho ke gae hain janaab-e-shaikh aa jaaeinge khumaar utarne ke baa'd hi bardaasht aur sabr se 'aari ho tum 'sha'ur' saaraa piyaala pi gae bharne ke baa'd hi"

"sar gharibon ke kham ziyaada hain is liye un ke gham ziyaada hain jaane vo zulf hai bahut pur-pech yaa giraftaar ham ziyaada hain kyaa uTheinge niyaaz-mandon se tere naaz ai sanam ziyaada hain dushmanon ke sitam hazaar sahi doston ke karam ziyaada hain sakht masrufiyat rahi phir bhi aaj ham taaza-dam ziyaada hain saahibaan-e-'alam hain chand 'sha'ur' saahibaan-e-qalam ziyaada hain"

"balaa se garebaan hai yaa nahin uTho jism mein jaan hai yaa nahin mohabbat mein aakhir ye kyaa sochnaa vo kaafir musalmaan hai yaa nahin kahaan dil pe koi asar vaqt kaa musalsal pareshaan hai yaa nahin bujhaane lage battiyaan mughbache kisi ko koi dhyaan hai yaa nahin ye maanaa ki duniyaa mein har chiiz hai masarrat kaa saamaan hai yaa nahin mashaqqat bhi dushvaar aaraam bhi koi kaam aasaan hai yaa nahin abhi tum ne dekhaa hi kyaa hai 'sha'ur' magar 'aql hairaan hai yaa nahin"

"tanhaai pasandida hai mahfil se ziyaada duniyaa mein koi dost kahaan dil se ziyaada har chiiz mayassar hui lekin na mile aap laa-haasili-e-'umr hai haasil se ziyaada maa'lum kahaan thaa ye mulaaqaat se pahle vo shakhs to aasaan hai mushkil se ziyaada ye raah munaasib hai ki vo raah munaasib parvaa-e-safar hai hamein manzil se ziyaada maanaa ki baDe ‘aalim-o-faazil hain 'sha'ur' aap aagaah nahin 'aam masaail se ziyaada"

"raabta subh-o-shaam hai ham se kyaa unhein koi kaam hai ham se tauba ne haath baandh rakkhe hain varna kyaa duur jaam hai ham se mustaqil khvaab dekhne pe khafaa roz-o-shab kaa nizaam hai ham se is jagah is maqaam se ham hain ye jagah ye maqaam hai ham se ham hain har khaas-o-'aam ke hamdard tang har khaas-o-'aam hai ham se ajnabi hain tiri gali mein magar aashnaa gaam gaam hai ham se kis ki aavaaz aa rahi hai 'shu'ur' kaun ye ham-kalaam hai ham se"

"us bazm mein kyaa koi sune raae hamaari ye baat ye auqaat kahaan haae hamaari ham chaahte kyaa hain nahin maa'lum kisi ko kis tarh tabi'at koi bahlaae hamaari guzri hai javaani baDi be-raah-ravi mein ai kaash za'ifi bhi guzar jaae hamaari is shahr mein rahnaa hai bayaabaan mein rahnaa surat nahin pahchaante hamsaae hamaari ye ghar ye gali zehn mein kar lijiye mahfuz mumkin hai kabhi aap ko yaad aae hamaari"

"log saae dikhaai dete hain phir bhi haae dikhaai dete hain bolte kuchh nahin magar mazlum tilmilaae dikhaai dete hain teraa ehsaanmand kaun nahin sab sataae dikhaai dete hain nazar aate hain sab tumhein apne ham paraae dikhaai dete hain un ki aankhon mein do sitaare se jagmagaae dikhaai dete hain nahin aate kabhi nahin aate aur aae dikhaai dete hain jheinpe jheinpe se lag rahe hain 'shu'ur' bin bulaae dikhaai dete hain"

"aasaaniyon ki raah khuli mushkilon ke baa'd ghar lauTnaa nasib huaa gardishon ke baa'd aise hi naa-umid nahin ho gae hain ham aayaa hai ye maqaam bahut koshishon ke baa'd jaate nahin ham ab haram-o-dair ki taraf is raaste pe aae hain gumraahiyon ke baa'd fauran qubuliyat kaa sharaf bakhshte nahin vo baat maante hain baDi minnaton ke baa'd sargoshiyaan sunaai na dein kyon bhalaa hamein suunaa huaa hai dil kaa makaan raunaqon ke baa'd rahtaa hai 'umr bhar vo tumhaari tarah 'sha'ur' jo aadmi sanbhal na sake Thokaron ke baa'd"

"tum guzre the kis jaldi se dekh rahaa thaa main khiDki se main imaan nahin bechungaa roTi khaa lungaa chaTni se sil ko bhi dil kar detaa hai gham achchhaa hotaa hai khushi se jis jis ne vo aankhein dekhin tauba kar li mai-noshi se nafsaa-nafsi kaa 'aalam hai rakh na 'sha'ur' ummid kisi se"