Ghazal

"ye mujh se puchhte hain chaaragar kyuun ki tu zinda to hai ab tak magar kyuun jo rasta chhoD ke main jaa rahaa huun usi raste pe jaati hai nazar kyuun thakan se chuur paas aayaa thaa us ke giraa sote mein mujh par ye shajar kyuun sunaaeinge kabhi fursat mein tum ko ki ham barson rahe hain dar-ba-dar kyuun yahaan bhi sab hain begaana hi mujh se kahun main kyaa ki yaad aayaa hai ghar kyuun main khush rahtaa agar samjhaa na hotaa ye duniyaa hai to main huun dida-var kyuun"

"dard kuchh din to mehmaan Thahre ham ba-zid hain ki mezbaan Thahre sirf tanhaai sirf viraani ye nazar jab uThe jahaan Thahre kaun se zakhm par paDaav kiyaa dard ke qaafile kahaan Thahre kaise dil mein khushi basaa luun main kaise muTThi mein ye dhuaan Thahre thi kahin maslahat kahin jurat ham kahin in ke darmiyaan Thahre"

"khulaa hai dar pa tiraa intizaar jaataa rahaa khulus to hai magar e'tibaar jaataa rahaa kisi ki aankh mein masti to aaj bhi hai vahi magar kabhi jo hamein thaa khumaar jaataa rahaa kabhi jo siine mein ik aag thi vo sard hui kabhi nigaah mein jo thaa sharaar jaataa rahaa ajab saa chain thaa ham ko ki jab the ham bechain qaraar aayaa to jaise qaraar jaataa rahaa kabhi to meri bhi sunvaai hogi mahfil mein main ye umiid liye baar baar jaataa rahaa"

"zindagi ki aandhi mein zehn kaa shajar tanhaa tum se kuchh sahaaraa thaa aaj huun magar tanhaa zakhm-khurda lamhon ko maslahat sambhaale hai an-ginat marizon mein ek chaaragar tanhaa buund jab thi baadal mein zindagi thi halchal mein qaid ab sadaf mein hai ban ke hai guhar tanhaa tum fuzul baaton kaa dil pe bojh mat lenaa ham to khair kar leinge zindagi basar tanhaa ik khilaunaa jogi se kho gayaa thaa bachpan mein DhunDtaa phiraa us ko vo nagar nagar tanhaa jhuTpuTe kaa aalam hai jaane kaun aadam hai ik lahad pe rotaa hai munh ko Dhaanp kar tanhaa"

"ye tasalli hai ki hain naashaad sab main akelaa hi nahin barbaad sab sab ki khaatir hain yahaan sab ajnabi aur kahne ko hain ghar aabaad sab bhuul ke sab ranjishein sab ek hain main bataaun sab ko hogaa yaad sab sab ko daavaa-e-vafaa sab ko yaqin is adaakaari mein hain ustaad sab shahr ke haakim kaa ye farmaan hai qaid mein kahlaaeinge aazaad sab chaar lafzon mein kaho jo bhi kaho us ko kab fursat sune fariyaad sab talkhiyaan kaise na huun ashaar mein ham pe jo guzri hamein hai yaad sab"

"ba-zaahir kyaa hai jo haasil nahin hai magar ye to miri manzil nahin hai ye tuuda ret kaa hai beach dariyaa ye bah jaaegaa ye saahil nahin hai bahut aasaan hai pahchaan us ki agar dukhtaa nahin to dil nahin hai musaafir vo ajab hai kaarvaan mein ki jo hamraah hai shaamil nahin hai bas ik maqtul hi maqtul kab hai bas ik qaatil hi to qaatil nahin hai kabhi to raat ko tum raat kah do ye kaam itnaa bhi ab mushkil nahin hai"

"pyaas ki kaise laae taab koi nahin dariyaa to ho saraab koi zakhm-e-dil mein jahaan mahaktaa hai isi kyaari mein thaa gulaab koi raat bajti thi duur shahnaai royaa pi kar bahut sharaab koi dil ko ghere hain rozgaar ke gham raddi mein kho gai kitaab koi kaun saa zakhm kis ne bakhshaa hai is kaa rakkhe kahaan hisaab koi phir main sunne lagaa huun is dil ki aane vaalaa hai phir azaab koi shab ki dahliz par shafaq hai lahu phir huaa qatl aaftaab koi"

"na khushi de to kuchh dilaasa de dost jaise ho mujh ko bahlaa de aagahi se mili hai tanhaai aa miri jaan mujh ko dhoka de ab to takmil ki bhi shart nahin zindagi ab to ik tamannaa de ai safar itnaa raaegaan to na jaa na ho manzil kahin to pahunchaa de tark karnaa hai gar taalluq to khud na jaa tu kisi se kahlaa de"

"dil mein mahak rahe hain kisi aarzu ke phuul palkon pe khilne vaale hain shaayad lahu ke phuul ab tak hai koi baat mujhe yaad harf harf ab tak main chun rahaa huun kisi guftugu ke phuul kaliyaan chaTak rahi thiin ki aavaaz thi koi ab tak samaaaton mein hain ik khush-gulu ke phuul mere lahu kaa rang hai har nok-e-khaar par sahraa mein har taraf hain miri justuju ke phuul divaane kal jo log the phulon ke ishq mein ab un ke daamanon mein bhare hain rafu ke phuul"

"sukhi Tahni tanhaa chiDiyaa phikaa chaand aankhon ke sahraa mein ek nami kaa chaand us maathe ko chume kitne din biite jis maathe ki khaatir thaa ik Tiikaa chaand pahle tu lagti thi kitni begaana kitnaa mubham hotaa hai pahli kaa chaand kam ho kaise in khushiyon se teraa gham lahron mein kab bahtaa hai naddi kaa chaand aao ab ham is ke bhi TukDe kar lein Dhaaka raavalpinDi aur dilli kaa chaand"

"ham ne DhunDein bhi to DhunDein hain sahaare kaise in saraabon pe koi umr guzaare kaise haath ko haath nahin sujhe vo taariki thi aa gae haath mein kyaa jaane sitaare kaise har taraf shor usi naam kaa hai duniyaa mein koi us ko jo pukaare to pukaare kaise dil bujhaa jitne the armaan sabhi khaak hue raakh mein phir ye chamakte hain sharaare kaise na to dam leti hai tu aur na havaa thamti hai zindagi zulf tiri koi sanvaare kaise"

"hamaare dil mein ab talkhi nahin hai magar vo baat pahle si nahin hai mujhe maayus bhi karti nahin hai yahi aadat tiri achchhi nahin hai bahut se faaede hain maslahat mein magar dil ki to ye marzi nahin hai har ik ki daastaan sunte hain jaise kabhi ham ne mohabbat ki nahin hai hai ik darvaaze bin divaar-e-duniyaa mafar gham se yahaan koi nahin hai"

"yaqin kaa agar koi bhi silsila nahin rahaa to shukr kijiye ki ab koi gilaa nahin rahaa na hijr hai na vasl hai ab is ko koi kyaa kahe ki phuul shaakh par to hai magar khilaa nahin rahaa khazaana tum na paae to gharib jaise ho gae palak pe ab koi bhi moti jhilmilaa nahin rahaa badal gai hai zindagi badal gae hain log bhi khulus kaa jo thaa kabhi vo ab silaa nahin rahaa jo dushmani bakhil se hui to itni khair hai ki zahr us ke paas hai magar pilaa nahin rahaa lahu mein jazb ho sakaa na ilm to ye haal hai koi savaal zehn ko jo de jalaa nahin rahaa"

"saari hairat hai miri saari adaa us ki hai be-gunaahi hai miri aur sazaa us ki hai mere alfaaz mein jo rang hai vo us kaa hai mere ehsaas mein jo hai vo fazaa us ki hai sher mere hain magar in mein mohabbat us ki phuul mere hain magar baad-e-sabaa us ki hai ik mohabbat ki ye tasvir hai do rangon mein shauq sab meraa hai aur saari hayaa us ki hai ham ne kyaa us se mohabbat ki ijaazat li thi dil-shikan hi sahi par baat bajaa us ki hai ek mere hi sivaa sab ko pukaare hai koi main ne pahle hi kahaa thaa ye sadaa us ki hai khuun se sinchi hai main ne jo zamin mar mar ke vo zamin ek sitam-gar ne kahaa us ki hai us ne hi is ko ujaaDaa hai ise luuTaa hai ye zamin us ki agar hai bhi to kyaa us ki hai"

"jism damaktaa, zulf ghaneri, rangin lab, aankhein jaadu sang-e-marmar, uudaa baadal, surkh shafaq, hairaan aahu bhikshu-daani, pyaasaa paani, dariyaa saagar, jal gaagar gulshan khushbu, koyal kuku, masti daaru, main aur tu baanbi naagin, chhaayaa aangan, ghunghru chhan-chhan, aashaa man aankhein kaajal, parbat baadal, vo zulfein aur ye baazu raatein mahki, saansein dahki, nazrein bahki, rut lahki sapn salonaa, prem khilaunaa, phuul bichhaunaa, vo pahlu tum se duri, ye majburi, zakhm-e-kaari, bedaari, tanhaa raatein, sapne kaatein, khud se baatein, meri khu"

"dil kaa har dard kho gayaa jaise main to patthar kaa ho gayaa jaise daagh baaqi nahin ki naqsh kahun koi divaar dho gayaa jaise jaagtaa zehn gham ki dhuup mein thaa chhaanv paate hi so gayaa jaise dekhne vaalaa thaa kal us kaa tapaak phir se vo ghair ho gayaa jaise kuchh bichhaDne ke bhi tariqe hain khair jaane do jo gayaa jaise"

"shukr hai khairiyat se huun saahab aap se aur kyaa kahun saahab ab samajhne lagaa huun sud-o-ziyaan ab kahaan mujh mein vo junun saahab zillat-e-zist yaa shikast-e-zamir ye sahun main ki vo sahun saahab ham tumhein yaad karte ro lete do-ghaDi miltaa jo sukun saahab shaam bhi Dhal rahi hai ghar bhi hai duur kitni der aur main rukun saahab ab jhukungaa to TuuT jaaungaa kaise ab aur main jhukun saahab kuchh rivaayaat ki gavaahi par kitnaa jurmaana main bharun saahab"

"main khud bhi sochtaa huun ye kyaa meraa haal hai jis kaa javaab chaahiye vo kyaa savaal hai ghar se chalaa to dil ke sivaa paas kuchh na thaa kyaa mujh se kho gayaa hai mujhe kyaa malaal hai aasudgi se dil ke sabhi daagh dhul gae lekin vo kaise jaae jo shishe mein baal hai be-dast-o-paa huun aaj to ilzaam kis ko duun kal main ne hi bunaa thaa ye meraa hi jaal hai phir koi khvaab dekhun koi aarzu karun ab ai dil-e-tabaah tiraa kyaa khayaal hai"

"sach ye hai be-kaar hamein gham hotaa hai jo chaahaa thaa duniyaa mein kam hotaa hai Dhaltaa suraj phailaa jangal rasta gum ham se puchho kaisaa aalam hotaa hai ghairon ko kab fursat hai dukh dene ki jab hotaa hai koi hamdam hotaa hai zakhm to ham ne in aankhon se dekhe hain logon se sunte hain marham hotaa hai zehn ki shaakhon par ashaar aa jaate hain jab teri yaadon kaa mausam hotaa hai"

"yahi haalaat ibtidaa se rahe log ham se khafaa khafaa se rahe in charaaghon mein tel hi kam thaa kyuun gila ham ko phir havaa se rahe bahs shatranj sher mausiqi tum nahin the to ye dilaase rahe zindagi ki sharaab maangte ho ham ko dekho ki pi ke pyaase rahe us ke bandon ko dekh kar kahiye ham ko ummid kyaa khudaa se rahe"

"gham hote hain jahaan zehaanat hoti hai duniyaa mein har shai ki qimat hoti hai aksar vo kahte hain vo bas mere hain aksar kyuun kahte hain hairat hoti hai tab ham donon vaqt churaa kar laate the ab milte hain jab bhi fursat hoti hai apni mahbuba mein apni maan dekhein bin maan ke laDkon ki fitrat hoti hai ik kashti mein ek qadam hi rakhte hain kuchh logon ki aisi 'aadat hoti hai"

"ham to bachpan mein bhi akele the sirf dil ki gali mein khele the ik taraf morche the palkon ke ik taraf aansuon ke rele the thiin saji hasratein dukaanon par zindagi ke ajiib mele the khud-kushi kyaa dukhon kaa hal banti maut ke apne sau jhamele the zehn o dil aaj bhuke marte hain un dinon ham ne faaqe jhele the"

"main kab se kitnaa huun tanhaa tujhe pataa bhi nahin tiraa to koi khudaa hai miraa khudaa bhi nahin kabhi ye lagtaa hai ab khatm ho gayaa sab kuchh kabhi ye lagtaa hai ab tak to kuchh huaa bhi nahin kabhi to baat ki us ne kabhi rahaa khaamosh kabhi to hans ke milaa aur kabhi milaa bhi nahin kabhi jo talkh-kalaami thi vo bhi khatm hui kabhi gila thaa hamein un se ab gila bhi nahin vo chikh ubhri baDi der gunji Duub gai har ek suntaa thaa lekin koi hilaa bhi nahin"

"dast-bardaar agar aap ghazab se ho jaaein har sitam bhuul ke ham aap ke ab se ho jaaein chaudhvin shab hai to khiDki ke giraa do parde kaun jaane ki vo naaraaz hi shab se ho jaaein ek khushbu ki tarah phailte hain mahfil mein aise alfaaz adaa jo tire lab se ho jaaein na koi ishq hai baaqi na koi parcham hai log divaane bhalaa kis ke sabab se ho jaaein baandh lo haath ki phailein na kisi ke aage si lo ye lab ki kahin vo na talab se ho jaaein baat to chheD mire dil koi qissa to sunaa kyaa ajab un ke bhi jazbaat ajab se ho jaaein"