Ghazal

"maujud jo thaa maa'dum samajh mein aayaa ik ulTaa hi mafhum samajh mein aayaa main jab peD se gir ke zamin ki khaak huaa tab ik 'aalam-e-mauhum samajh mein aayaa main hi main huun aankh uThti hai jidhar bhi ab naa-maa'lum bhi maa'lum samajh mein aayaa ulTe mantar hi shaayad main paDhtaa huun jo zaahir thaa maa'dum samajh mein aayaa ziist ko main ik aab-e-ravaan kahtaa huun 'tur' kyaa tum ko ye mafhum samajh mein aayaa"

"ik e'timaad ajab saa yaqin pe rakhtaa huun vo kyaa hai main jise apni jabin pe rakhtaa huun yahi to baat hui jaa rahi hai mere khilaaf kahin pe milti hai ik shai kahin pe rakhtaa huun jo chiiz dekhne ki hai vo baar baar rahe main is tarah kaa tamaasha zamin pe rakhtaa huun ghubaar hoti hui jaa rahi hai ye duniyaa hai haan kaa shaaiba jis ko nahin pe rakhtaa huun kise khabar hai ye kis vaqt kaam aa jaae hai khaak khaak jise aastin pe rakhtaa huun havaa ho yaa ki na ho 'tur' main charaagh-e-ishq huun chaahtaa jahaan rakhnaa vahin pe rakhtaa huun"

"ye dar ye taaq ye chaukhaT ye ghar malaal kaa hai safar mein jitnaa hai zaad-e-safar malaal kaa hai main kaisi saaat-e-bad-bakht mein muqayyad huun duaa khushi ki hai zaahir asar malaal kaa hai ruki hui hai hayaat ik ajab doraahe par idhar hansi kaa ijaara udhar malaal kaa hai sajaae rakkhaa hai ham ko anaa ki suuli par koi agar hai to bas ye hunar malaal kaa hai sambhaal rakkhaa hai ab jis qadar hai sarmaaya ziyaada kuchh nahin bas ek ghar malaal kaa hai ravaan huun main usi jaanib jidhar hai vo basti mire liye to ye saaraa safar malaal kaa hai lagaae rakkheinge siine se us ko ham ai 'tur' hayaat mein koi TukDaa agar malaal kaa hai"

"ek diyaa dahliz pe rakkhaa bhuul gayaa ghar ko lauT ke aane vaalaa bhuul gayaa ye kaisi be-aab zamin kaa saamnaa thaa khud ko qatra qatre ko dariyaa bhuul gayaa main to thaa maujud kitaab ke lafzon mein vo hi shaayad mujh ko paDhnaa bhuul gayaa kis ke jism ki baarish ne sairaab kiyaa kyuun uDnaa mausam kaa parinda bhuul gayaa aakhir ye honaa thaa aakhir yahi huaa duniyaa mujh ko aur main duniyaa bhuul gayaa main bhi huun mansub kisi ke qatl se ab suraj meri chhat pe chamaknaa bhuul gayaa vafaa kaa khoTaa sikka kab tak chaltaa 'tur' achchhaa huaa jo apnaa paraayaa bhuul gayaa"

"bahut kahaa thaa sukhan-varon mein guzar na karnaa bahut kahaa thaa ki baat sunnaa magar na karnaa bahut kahaa thaa ki Dubne kaa hai Dar ziyaada bahut kahaa thaa ki paaniyon kaa safar na karnaa bahut kahaa thaa ki tum akele na rah sakoge bahut kahaa thaa ki ham ko yuun dar-ba-dar na karnaa bahut kahaa thaa vo tum ko pahchaantaa nahin hai bahut kahaa thaa tum us ko apni khabar na karnaa bahut kahaa thaa ki raabton ko daraaz rakhnaa bahut kahaa thaa mohabbatein mukhtasar na karnaa bahut kahaa thaa ki ishq aakhir to ishq Thahraa bahut kahaa thaa kisi ko is ki khabar na karnaa bahut kahaa thaa zamin se rishta na 'tur' TuuTe bahut kahaa thaa falak ko zer-e-asar na karnaa"

"bhalaa kahaan kise mumkin hai ye adaa har baar charaagh rakhtaa hai lau par dam-e-havaa har baar tu apne haathon ki ThanDak se kar mujhe maanus tu meri aankhon pe rakh shoala-e-hinaa har baar kabhi to mere lahu ke nishaan baneinge phuul main gham ke dasht se guzraa barahna-paa har baar ye meri zaat se nisbat hui hai ab kis ko main khud ko dekhtaa huun kyuun judaa judaa har baar kabhi to chamkegaa dil raas aaegi duniyaa jahaan se guzraa huun ye sochtaa huaa har baar bachaa ke rakkhe salaamat na koi jaan apni sunaai deti hai bas ik yahi sadaa har baar vo 'tur' kyuun miri baaton pe ghussa kartaa hai akhartaa kyuun hai use meraa puchhnaa har baar"

"na us ko dekhaa na taab-o-tavaan ravaana kiye tamaam-umr kaTi miTTi mein Thikaanaa kiye na us se vasl kiyaa aur na haa-o-hu hi ki zamaana guzraa koi kaar-e-aarifaana kiye dilon ko zakhm diye aur azaab aankhon ko jo kaam us ne kiye saare munsifaana kiye main apne-aap ko pahchaantaa nahin huun abhi main aankh muund ke leTaa huun ye bahaana kiye ye aisaa daav hai jab pheinko ulTaa paDtaa hai sameTe baiThe ho kyaa ishq ko khazaana kiye ho us se vasl ke taalib bhari sabhaa mein 'tur' kahaan ye hosh-o-havaas aap ne ravaana kiye"

"lafzon mein asar kahaan se aayaa raste mein ye ghar kahaan se aayaa main hijr mein muskuraa rahaa huun mujh mein ye hunar kahaan se aayaa ik aag si ab lagi hui hai paani mein asar kahaan se aayaa nezon pe saron ko dekhtaa huun divaar mein dar kahaan se aayaa lau dene lage hain khaak-daan bhi miTTi mein asar kahaan se aayaa ab main kyaa bataaun mujh mein ai 'tur' jiine kaa hunar kahaan se aayaa"

"kyaa bolun kaisi arzaani meri thi vo suraj thaa aur peshaani meri thi ik tasvir nihaan thi vaqt ke parde mein ghaur se jo main ne pahchaani meri thi jitne bhi maujud the manzar us ke the aur aankhon ki sab hairaani meri thi ab dekhun to naa-mumkin saa lagtaa hai ye duniyaa ik din divaani meri thi farq hi kyaa thaa sar jaataa yaa rah jaataa jab sach ki fasl-e-imkaani meri thi main hi havaa mein ungliyon se likhtaa thaa ab jitni bhi thi hairaani meri thi kaise kaTti ye zanjir-e-taalluq-e-taur jab duniyaa bhar ki viraani meri thi"

"ruup kaa rasiyaa sukh kaa khoji dil hai vo baalak naadaan dar dar ghume banaa bhikaari maange khushiyon kaa daan jalti bujhti shamon se puchho raat ke siine kaa dard uDte pakheru batlaaeinge suraj ki har muskaan kaun chakhe ye paan kaa biiDaa kaun chaDhaae chillaa nas nas TuuT TuuT rah jaae jivan vo kaDi kamaan us kaa jism hai jaise havaa mein machalte dhaan ki baali us ki shokh kaTili nazrein jaise arjun ke baan kabhi kabhi to phuul ki khushbu bhi kar deti hai zukaam kabhi kabhi to sharaab bhi hoti hai jivan kaa vardaan mol-tol kab karte hain bhalaa dil si shai ke gaahak mahngi bike yaa sasti uTThe hain donon ek samaan ham se bhi kuchh kah lo sun lo ai jaane vaali raato ham bhi to hain is duniyaa mein do ghaDiyon ke mehmaan"

"main manzar huun pas-e-manzar se meraa rishta bahut aakhir meri peshaani par suraj chamkaa bahut jaane kaun se ism-e-anaa ke ham zindaani the tere naam ko le kar ham ne khudaa ko chaahaa bahut un se kyaa rishta thaa vo kyaa mere lagte the girne lage jab peD se patte to main royaa bahut kaisi masaafat saamne thi aur safar thaa kaisaa lahu main ne us ko us ne mujh ko muD ke dekhaa bahut kis ke dast-e-savaal mein hai ik lambi chup kaa charaagh jhaanktaa hai kyuun ik khiDki se koi chehra bahut hai dariyaa ke lams pe naazaan ik kaaghaz ki naav suraj se baatein kartaa hai ek daricha bahut saari umr kisi ki khaatir suuli pe laTkaa rahaa shaayad 'tur' mere andar ik shakhs thaa zinda bahut"

"dasht mein pahle vo samundar chamkaataa hai tab phir siine mein khanjar chamkaataa hai bhiiD se vo kartaa hai mujhe kuchh aise judaa bar neze par meraa sar chamkaataa hai bhed kholtaa hai vo yuun apne hone kaa har aane vaale kaa ghar chamkaataa hai dekhun vo kab kartaa hai zang-e-anaa kaafur dekhun vo kab meraa andar chamkaataa hai varna kyaa miTTi kyaa miTTi ki kaayaa kuchh to hai jo vo zamin par chamkaataa hai taare suraj phuul samundar chiDiyaa mein vo kaise kaise manzar chamkaataa hai vo kab rahne detaa hai mujh ko akelaa 'tur' aankh ik nilam si shab bhar chamkaataa hai"

"ik khaali chaand hi lab-e-ju rakhnaa thaa us ke hijr kaa ye bhi pahlu rakhnaa thaa sab kaa daaman motiyon se bharne vaale meri aankh mein bhi ik aansu rakhnaa thaa suraj karnaa thaa meri peshaani ko is miTTi mein ye bhi jaadu rakhnaa thaa kis ki aankhein kahaan ki aankhein harf huiin patthar the to khud par qaabu rakhnaa thaa kiyaa thaa us ke naam ki lau ko raushan jab dilon mein aks-e-khiraam-e-aahu rakhnaa thaa jab haasil laa-haasil donon ek se the phir khud ko na asir-e-man-o-tu rakhnaa thaa yaad kaa khanjar utaarnaa thaa siine mein der tak ik manzar ko khushbu rakhnaa thaa ik aalam se bhar kar us ki jholi 'tur' apni hatheli par barg-e-hu rakhnaa thaa"

"ik kaa ghunT samundar ik kaa paikar pyaas paani aab-e-hayaat aur sikandar pyaas amrit-bund aasmaan se Tapkaa paani garm tave par ek parinda-e-be-par pyaas biich ki ek lakir hi ab faisla kare kis ke baazu paani kis ki chaadar pyaas donon bahr-e-shola-e-zaat donon asir-e-anaa dariyaa ke lab par paani dasht ke lab par pyaas rang-e-lahu se gulgun aab-e-nahr-e-furaat ahd-e-vafaa kaa aaina ek samundar pyaas shaayad ik khanjar hi dil shaadaab kare vo ik tanhaa pyaasaa meri ghar bhar pyaas 'tur' vahi hisaar hai gham-e-arzaani kaa baahar ki samt naqsh hai jo ik patthar pyaas"

"detaa hai koi mujh ko sadaa baahar aa ai mere badan mein qaid havaa baahar aa kab se hilaa rahaa huun zanjir-e-dar-e-shab tu hi le kar haathon mein diyaa baahar aa kyuun banaa huaa hai hadaf zamaane kaa guzraa hai kyaa tujh pe saaneha baahar aa taaq mein kab se sajaa rahaa huun yaad-e-charaagh tu hi to hai ik meraa aashnaa baahar aa kab tak tu aasmaan mein chhup ke baiThegaa maang rahaa huun main kab se du'aa baahar aa tujhe yaqin agar hai apne hone kaa aa ai meri jaan-e-be-navaa baahar aa sang-e-malaamat se bach jaae to jaanein 'tur' is shahr-e-munaafiq mein zaraa baahar aa"

"is darja apne aap se kal Dar lagaa mujhe ik qatra ashk kaa bhi samandar lagaa mujhe kar le mire khulus se zebaaish-e-dukaan andar ki chiiz jaan ke baahar lagaa mujhe ehsaas kaa ye husn-e-nazaakat bhi khuub hai us ne to phuul pheinkaa thaa patthar lagaa mujhe khaae hain itne zakhm mohabbat ke naam par dekhaa kisi ne pyaar se to Dar lagaa mujhe main apni rif’aton se rahaa khud hi ajnabi us se judaa huaa huun to aksar lagaa mujhe dekhaa kisi ko hanste hue 'tur' jab kabhi maanus saa ye dard kaa manzar lagaa mujhe"

"jo nahin hai usi manzar mein bahut hotaa hai ye sunaa hai to mire ghar mein bahut hotaa hai haarnaa meraa muqaddar hai ye sab jaante hain shor phir kyuun mire lashkar mein bahut hotaa hai aise hi aati nahin ishq mein sajda-sifati khuun kaa zor qalandar mein bahut hotaa hai vaqt se dahr ki har chiiz pe hotaa hai asar kam jo dikhtaa hai muqaddar mein bahut hotaa hai pyaas bujhti hai kahaan tishna-labon ki is se paani kahne ko samundar mein bahut hotaa hai kuchh karishma bhi dikhaati hai lahu ki khushbu kuchh mazaa bhi havas-e-zar mein bahut hotaa hai 'tur' vo chaahe to sarsabz mujhe bhi kar de moajaza dast-e-hunar-var mein bahut hotaa hai"

"apne mar-miTne ke asbaab bahut dekhtaa huun 'ishq vaalaa huun tire khvaab bahut dekhtaa huun ye bhi hai ek sabab is miri tanhaai kaa apne chaaron taraf ahbaab bahut dekhtaa huun aur to aur tiri yaad se bhi huun ghaafil main yahaan khud ko zafar-yaab bahut dekhtaa huun kuchh to us husn mein rakhi hai khudaa ne taasir aur kuchh logon ko betaab bahut dekhtaa huun arsa-e-dahr to hai meri nigaahon kaa tilism jab bhi main dekhtaa huun khvaab bahut dekhtaa huun in dinon apne ko rakhtaa huun bahut khud ke qarib in dinon dahr ko khun-naab bahut dekhtaa huun mujh ko marnaa hai kisi jhiil si aankhon mein 'tur' hai yahi vajh ki mahtaab bahut dekhtaa huun"

"us ne jo dard kaa ambaar lagaayaa huaa hai ham ne bhi dil sar-e-baazaar lagaayaa huaa hai ek aafat ki tarah ham ne ab is siine se thaa lagaanaa jise sarkaar lagaayaa huaa hai pyaar ki taaza havaa aae kahaan se ham ne khud ko ik surat-e-divaar lagaayaa huaa hai kyaa kisi but ki mohabbat mein giraftaar hue kyuun bhalaa siine se zunnaar lagaayaa huaa hai ek lamhe ko bhi maujud nahin hai raahat ghar mein kyaa halqa-e-aghyaar lagaayaa huaa hai apne se duur bhi rakkhaa hai bahut tu ne hamein ek tasma saa bhi ai yaar lagaayaa huaa hai taaki tafriq dilon mein na rahe hargiz 'tur' ham ne is paar ko us paar lagaayaa huaa hai"

"saahil se biich samundar gahraa paani ghar miTTi ghar se baahar gahraa paani ye asraar hai zaahir us ke hone kaa manzar ho yaa pas-manzar gahraa paani dil ko kyaa dekhte ho ai dekhne vaalo baahar khushki aur andar gahraa paani Duub ke hi main shaayad paar nikal jaaun meraa kyaa mere andar gahraa paani vaqt kab ik si haalat rahne detaa hai ho jaataa hai ret aksar gahraa paani aasmaan par chaand chamaktaa hai khaali niche hai poshida gauhar gahraa paani be-paayaan kartaa huun 'tur' apne ko main ik khaali tasht mein bhar kar gahraa paani"

"kitaab-e-ishq mein saaraa bayaan visaal kaa hai main zinda hijr mein huun aur gumaan visaal kaa hai ham aise farq-e-taalluq se khud bhi hairaan hain zamin hai hijr ki aur aasmaan visaal kaa hai ajab tazaad ke pesh-e-nazar huun hasti mein hai dhuup hijr ki aur saaebaan visaal kaa hai hai jaagne pe hi paDtaa tamaam chaabuk-e-hijr hon aankhein band to saaraa samaan visaal kaa hai chalo ye hijr sahi kuchh to dastaras mein rahe jo vaqt aataa hai vo bhi kahaan visaal kaa hai gharaz se chup hain magar ahl-e-dil samajhte hain ki lafz-e-hijr se raushan-bayaan visaal kaa hai kashid karte hain irfaan apne hijr se 'tur' ye khitta chhoD ke saaraa jahaan visaal kaa hai"

"thiin sabhi mehraabein raushan baam-o-dar aabaad the ik zamaana thaa ki jab ye saare ghar aabaad the khaak si uDti nazar aati hai ab har ik taraf vo bhi din the jab mohabbat ke nagar aabaad the kyaa dilon ki surat-e-haalaat tum se ham kahein ye makaan barbaad hain ab jis qadar aabaad the ret uDti hai ab aankhon mein magar ik vaqt thaa vasl ki duniyaa ke jitne the safar aabaad the vo bhi mausam thaa mohabbat kaa bahut jaan-aafrin jab hamaare dil yahaan shaam-o-sahar aabaad the varna kyon mazhar mein aataa vaaqia mearaaj kaa aasmaanon se udhar shaayad bashar aabaad the ek ye din hain falak-aasaar hai 'tur' ab zamin ek vo din the ki ye shams-o-qamar aabaad the"

"jab purab mein niil ambar par ik kafuri phuul khilaa raat guzarne ke gham mein taaron ne hiiraa chaaT liyaa lok parlok pe phail rahi hai yaadon ki chanchal khushbu dhyaan ke Thahre saagar mein kis ne phir kankar pheink diyaa us ke narm madhur bolon ne dil par chhaavni chhaai thi yaa tapti sukhi dharti par chhaajon hi meinh barsaa thaa jal vahi hai amrit jal jis se janm janm ki pyaas bujhe chaahe vo pachchhim kaa 'thames' ho chaahe vo purab ki gangaa kyaa jaane kyaa baat thi lekin ham jab pahli baar mile vo bhi khaDi rahi gum-sum si aur main bhi chup chaap rahaa jab bhi 'tur' use DhunDne ko gahre banon mein jaataa huun ik aavaaz ye kahti hai mujh se murakh ghar ko vaapas jaa"

"main vahm huun ki haqiqat ye haal dekhne ko giraft hotaa huun apnaa visaal dekhne ko charaagh kartaa huun apnaa har ek azv-e-badan taras gayaa huun gham-e-laa-zavaal dekhne ko ye aadmi hain ki patthar javaab dete nahin chale hain koh-e-nidaa se savaal dekhne ko na sher hain na sataaish ajab zamaana hai kahin pe miltaa nahin ab kamaal dekhne ko main 'tur' aakhiri saaat kaa ek manzar huun vo aa rahaa hai mujhe be-misaal dekhne ko"