Ghazal

"nafraton se laDo pyaar karte raho apne hone kaa izhaar karte raho itne achchhe banoge to mar jaaoge thoDe dushman bhi tayyaar karte raho zindagi se mohabbat karo TuuT kar maut kaa kaam dushvaar karte raho"

"chalte rahne ke liye dil mein gumaan koi to ho be-natija hi sahi par imtihaan koi to ho aasmaanon ke sitam sahti hain is ke baavajud sab zaminein chaahti hain aasmaan koi to ho mehrbaanon hi se bach kar aae the tum dasht mein ab yahaan bhi lag rahaa hai mehrbaan koi to ho qahqahon ko yaad rakhti hi nahin duniyaa kabhi is liye dukh ki bhi pyaare daastaan koi to ho kar rahaa huun main darakhton se musalsal guftugu is ghane jangal mein 'daanish' ham-zabaan koi to ho"

"zidon ko apni taraasho aur un ko khvaab karo phir us ke baad hi manzil kaa intikhaab karo mohabbaton mein nae qarz chaDhte rahte hain magar ye kis ne kahaa hai kabhi hisaab karo tumhein ye duniyaa kabhi phuul to nahin degi mile hain kaanTe to kaanTon ko hi gulaab karo siyaah raato chamakti nahin hai yuun taqdir uThaao apne charaaghon ko maahtaab karo kai sadaaein Thikaana talaash karti hui fazaa mein guunj rahi hain unhein kitaab karo kisi ke rang mein Dhalnaa hi hai agar 'daanish' to apne aap ko thoDaa bahut kharaab karo"

"tumhaare saath jo bartaa huaa hai vo lamha jas kaa tas rakkhaa huaa hai abhi ye rang jo pahnaa hai tum ne yahi mausam ne bhi pahnaa huaa hai tumhaaraa naam kyon puchhegaa koi yahaan har phuul pe likkhaa huaa hai"

"aadhi aag aur aadhaa paani ham donon jalti-bujhti ek kahaani ham donon mandir masjid girja-ghar aur guru-dvaara lafz kai hain ek ma'aani ham donon ruup badal kar naam badal kar aate hain faani ho kar bhi laa-faani ham donon gyaani dhyaani chatur siyaani duniyaa mein jiite hain apni naadaani ham donon aadhaa aadhaa baanT ke jiite rahte hain raunaq ho yaa ho viraani ham donon nazar lage naa apni jagmag duniyaa ko karte rahte hain nigaraani ham donon khvaabon kaa ik nagar basaa lete hain roz aur ban jaate hain sailaani ham donon tu saavan ki shokh ghaTaa mein pyaasaa ban chal karte hain kuchh man-maani ham donon ik-duje ko roz sunaate hain 'daanish' apni apni raam-kahaani ham donon"

"hai intizaar muqaddar to intizaar karo par apne dil ki fazaa ko bhi khush-gavaar karo tumhaare pichhe lagi hain udaasiyaan kab se kisi paDaav pe ruk kar inhein shikaar karo hamaare khvaabon kaa dar khaTkhaTaati rahti hain tum apni yaadon ko samjhaao hoshiyaar karo bhali lagegi yahi zindagi agar us mein khayaal-o-khvaab ki duniyaa ko bhi shumaar karo bharosa baa'd mein kar lenaa saari duniyaa par tum apne aap pe to pahle e’tibaar karo"

"rang-e-duniyaa kitnaa gahraa ho gayaa aadmi kaa rang phikaa ho gayaa raat kyaa hoti hai ham se puchhiye aap to soe saveraa ho gayaa Dubne ki zid pe kashti aa gai bas yahin majbur dariyaa ho gayaa aaj khud ko bechne nikle the ham aaj hi baazaar manda ho gayaa gham andhere kaa nahin 'daanish' magar vaqt se pahle andheraa ho gayaa"

"tum apne aap par ehsaan kyuun nahin karte kiyaa hai ishq to elaan kyuun nahin karte sajaae phirte ho mahfil na jaane kis kis ki kabhi parindon ko mehmaan kyuun nahin karte vo dekhte hi nahin jo hai manzaron se alag kabhi nigaah ko hairaan kyuun nahin karte puraani samton mein chalne ki sab ko aadat hai nai dishaaon kaa vo dhyaan kyuun nahin karte bas ik charaagh ke bujhne se bujh gae 'daanish' tum aandhiyon ko pareshaan kyuun nahin karte"

"ham apne dukh ko gaane lag gae hain magar is mein zamaane lag gae hain kisi ki tarbiyat kaa hai karishma ye aansu muskuraane lag gae hain kahaani rukh badalnaa chaahti hai nae kirdaar aane lag gae hain ye haasil hai miri khaamoshiyon kaa ki patthar aazmaane lag gae hain ye mumkin hai kisi din tum bhi aao parinde aane jaane lag gae hain jinhein ham manzilon tak le ke aae vahi rasta bataane lag gae hain sharaafat rang dikhlaati hai 'daanish' kai dushman Thikaane lag gae hain"

"aur kyaa aakhir tujhe ai zindagaani chaahiye aarzu kal aag ki thi aaj paani chaahiye ye kahaan ki riit hai jaage koi soe koi raat sab ki hai to sab ko niind aani chaahiye is ko hansne ke liye to us ko rone ke liye vaqt ki jholi se sab ko ik kahaani chaahiye kyuun zaruri hai kisi ke pichhe pichhe ham chalein jab safar apnaa hai to apni ravaani chaahiye kaun pahchaanegaa 'daanish' ab tujhe kirdaar se be-muravvat vaqt ko taaza nishaani chaahiye"

"rang-e-duniyaa itnaa gahraa ho gayaa aadmi kaa rang phikaa ho gayaa raat kyaa hoti hai ham se pochhiye aap to soe saveraa ho gayaa aaj khud ko bechne nikle the ham aaj hi baazaar manda ho gayaa gham andhere kaa nahin 'daanish' magar vaqt se pahle andheraa ho gayaa"

"kuchh us maqaam se ab dil kaa kaarvaan guzre yaqin ki had se jo guzre to be-zabaan guzre ye ittifaaq kahaan hai ki aankh bhar aai mohabbaton mein koi kaise be-nishaan guzre mujhi se ho ke guzarti hai raah duniyaa ki so mujh se ho ke zamin aur aasmaan guzre taalluqaat mein vo marhale bhi kaise the yaqin aur gumaan ke jo darmiyaan guzre tilism-e-rang mein uljhe hue hain sab 'daanish' jo dekhne hain vo manzar abhi kahaan guzre"

"Dar se pichhaa chhuDaa liyaa main ne us ko sab kuchh bataa diyaa main ne us kaa chehra banaane se pahle phuul se mashvara kiyaa main ne aasmaan ki nazar se bachte hue ik sitaara uThaa liyaa main ne us ki aankhon mein ek baat jo thi us ko honTon pe rakh diyaa main ne jab se lahja badal gayaa us kaa apnaa rasta badal liyaa main ne"

"sitaare jinki bahut dekh-bhaal karte rahe ham aisi saari shabon ko nihaal karte rahe hamaare raah-numaa bhi kamaal karte rahe javaab denaa thaa un ko savaal karte rahe magar nadi ne suni hi nahin kinaaron ki ye aur baat ki vo arz-e-haal karte rahe tamaam raat miri niind mujh ko Dasti rahi tamaam khvaab miri dekh-bhaal karte rahe tamaam umr tumhin mutmain rahe 'daanish' tamaam umr tumhin the malaal karte rahe"

"ye maanaa nindon se aksar fareb khaate rahe hamaare khvaab magar phir bhi jagmagaate rahe vo saada log kahin ab nazar nahin aate jo dusron ke liye raasta banaate rahe kai sitaare jinhein aasmaan sataataa rahaa unhein zamin pe laa kar hamin sajaate rahe hamin ne lamhon ko yakjaa kiyaa to raat hui hamin bikher ke lamhon ko din banaate rahe farishton jaise hi hote hain tajrbe 'daanish' tamaam 'umr hamin raasta bataate rahe"

"ye maanaa us taraf rasta na jaae magar phir bhi mujhe rokaa na jaae badal sakti hai rukh tasvir apnaa kuchh itne ghaur se dekhaa na jaae ulajhne ke liye sau uljhanein hain bas apne aap se uljhaa na jaae iraada vaapsi kaa ho agar to bahut gahraai mein utraa na jaae hamaari arz bas itni hai 'daanish' udaasi kaa sabab puchhaa na jaae"

"har ek lamha miri aag mein guzaare koi phir us ke baad mujhe ishq mein utaare koi main apni guunj ko mahsus karnaa chaahtaa huun utar ke mujh mein mujhe zor se pukaare koi ab aarzu hai vo har shai mein jagmagaane lage bas ek chehre mein kab tak use nihaare koi falak pe chaand-sitaare Tange hain sadiyon se main chaahtaa huun zamin par inhein utaare koi hai dukh to kah do kisi peD se parinde se ab aadmi kaa bharosa nahin hai pyaare koi"

"koi ye laakh kahe mere banaane se milaa har nayaa rang zamaane ko puraane se milaa fikr har baar khamoshi se mili hai mujh ko aur zamaana ye mujhe shor machaane se milaa us ki taqdir andheron ne likhi thi shaayad vo ujaalaa jo charaaghon ko bujhaane se milaa puchhte kyaa ho milaa kaise ye jangal ko tilism chhaanv mein dhuup ki rangat ko milaane se milaa aur logon se mulaaqaat kahaan mumkin thi vo to khud se bhi milaa hai to bahaane se milaa meri tashkil to kuchh aur hui thi 'daanish' ye nayaa naqsh mujhe khud ko miTaane se milaa"