kaun jaane kis ghaDi yaan kyaa se kyaa ho kar rahe — Aazim Kohli

zindagi sundar ghazal hai dosto
zindagi ko gungunaanaa chaahiye

dukh pe mere ro rahaa thaa jo bahut
jaate jaate kah gayaa achchhaa huaa

'aazim' teri barbaadi mein sab ne mil-jul kar kaam kiyaa
kuchh khel lakiron kaa bhi hai kuchh vaqt ki kaar-guzaari bhi

baat chal niklegi phir iqraar ki inkaar ki
phir vahi bachpan ke bhule giit gaae jaaeinge

sabr ki takraar thi josh o junun-e-ishq se
zindagi bhar dil mujhe main dil ko samjhaataa rahaa

mohabbat karne vaale dard mein tanhaa nahin hote
jo ruThoge kabhi mujh se to apnaa dil dukhaaoge

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

jaante the donon ham us ko nibhaa sakte nahin
us ne vaada kar liyaa main ne bhi vaada kar liyaa

guzishta kuchh dinon se jaane kis uljhaao mein hai dil
ki ham baiThe bhi rahte hain ghazal-khvaani nahin hoti