haath se kho na baiThnaa us ko — Abdul Hamid Adam

zindagi zor hai ravaani kaa
kyaa thamegaa bahaav paani kaa

ijaazat ho to main tasdiq kar luun teri zulfon se
sunaa hai zindagi ik khub-surat daam hai saaqi

savaal kar ke main khud hi bahut pashemaan huun
javaab de ke mujhe aur sharmsaar na kar

marne vaale to khair hain bebas
jiine vaale kamaal karte hain

mai-kada hai yahaan sukun se baiTh
koi aafat idhar nahin aati

saaqi mujhe sharaab ki tohmat nahin pasand
mujh ko tiri nigaah kaa ilzaam chaahiye

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

koi puraanaa khat kuchh bhuli-bisri yaad
zakhmon par vo lamhe marham hote hain

yuun to qadam qadam pe hai divaar saamne
koi na ho to khud se ulajh jaanaa chaahiye

saadgi o purkaari be-khudi o hushyaari
husn ko taghaaful mein jurat-aazmaa paayaa