be-rukhi dekh ab zamaane ki — Abdul Mateen Niyaz

ham-nafas khvaab-e-junun ki koi taabir na dekh
raqs karnaa hai to phir paanv ki zanjir na dekh

dil ne har daur mein duniyaa se baghaavat ki hai
dil se tum rasm-o-rivaayaat ki baatein na karo

logon ko apni fikr hai lekin mujhe nadim
bazm-e-hayaat-o-nazm-e-gulistaan ki fikr hai

vaqt mohlat na degaa phir tum ko
tiir jis dam kamaan se niklaa

kitne be-nur hain ye hangaame
main bhare shahr mein bhi huun tanhaa

intishaar-o-khauf har ik sar mein hai
aafiyat se kaun apne ghar mein hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge