ishq ke mazmun the jin mein vo risaale kyaa hue — Abu Mohammad Sahar

takmil-e-aarzu se bhi hotaa hai gham kabhi
aisi duaa na maang jise bad-duaa kahein

hindu se puchhiye na musalmaan se puchhiye
insaaniyat kaa gham kisi insaan se puchhiye

'sahar' ab hogaa meraa zikr bhi raushan-dimaaghon mein
mohabbat naam ki ik rasm-e-bejaa chhoD di main ne

hamein tanhaaiyon mein yuun to kyaa kyaa yaad aataa hai
magar sach puchhiye to ek chehraa yaad aataa hai

hosh-mandi se jahaan baat na banti ho 'sahar'
kaam aise mein bahut be-khabari aati hai

phir khule ibtidaa-e-ishq ke baab
us ne phir muskuraa ke dekh liyaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

aatish-e-ishq vo jahannam hai
jis mein firdaus ke nazaare hain

mohabbat ne 'maail' kiyaa har kisi ko
kisi par kisi ko kisi par kisi ko

mushkil-e-ishq mein laazim hai tahammul 'saaqib'
baat bigDi hui banti nahin ghabraane se

charchaa hamaaraa ishq ne kyuun jaa-ba-jaa kiyaa
dil us ko de diyaa to bhalaa kyaa buraa kiyaa