jab bhi dil khol ke roe honge — Ahmad Faraz

sunaa hai log use aankh bhar ke dekhte hain
so us ke shahr mein kuchh din Thahar ke dekhte hain

TuuTaa to huun magar abhi bikhraa nahin 'faraaz'
mere badan pe jaise shikaston kaa jaal ho

'faraaz' ishq ki duniyaa to khub-surat thi
ye kis ne fitna-e-hijr-o-visaal rakkhaa hai

judaaiyaan to muqaddar hain phir bhi jaan-e-safar
kuchh aur duur zaraa saath chal ke dekhte hain

zindagi teri ataa thi so tire naam ki hai
ham ne jaise bhi basar ki tiraa ehsaan jaanaan

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

aks-e-yaad-e-yaar ko dhundlaa kiyaa hai
main ne khud ko jaan kar tanhaa kiyaa hai

lagaai kis but-e-mai-nosh ne hai taak us par
subu-ba-dosh hai saaqi jo aabla dil kaa

dil rijhaa hai tujh pe aisaa bad-gumaan hogaa nahin
tu nahin aayaa to samjhaa tu yahaan hogaa nahin

dil o nigaah kaa ye faasla bhi kyuun rah jaae
agar tu aae to main dil ko aankh mein rakh luun